ბათუმის მერიის ინფორმაციით, ამ ეტაპზე მიმდინარეობს დაზარალებული მოსახლეობის შესახებ ინფორმაციის შეგროვება და თითოეულ განცხადებას ბათუმის მერიაში არსებული სპეციალურ კომისიის წევრები განიხილავენ.
დახმარების თხოვნით, ბათუმის მერს მოქალაქეები წერილობითაც მიმართავენ, როგორც მერიაში „ბათუმელებს“ განუმარტეს, ყველა განცხადებას ინდივიდუალურად განიხილავენ და მიიღებენ გადაწყვეტილებას, ვის რა ფორმით დაეხმარონ. შესაძლოა კომისიის წევრების გადაწყვეტილებით, დაზარალებულმა მოსახლეობამ ფულადი კომპენსაცია მიიღოს ან საჭიროების შემთხვევაში სამშენებლო მასალებით დაეხმარონ.
ბათუმის მერიაში ამ ეტაპზე არ განიხილავენ დაზარალებული, კომერციული ფართების მეპატრონეების დახმარებას. ბათუმის ბიუჯეტით მხოლოდ დაზარალებულ მოსახლეობას დაეხმარებიან.
ძლიერი წვიმის დროს, ბათუმში, პუშკინის ქუჩაზე მდებარე მაღაზიანების ნაწილი დაიტბორა. ე.წ ჭაობის დასახლებაში და წვიმის დროს წყალი სახლებში შევიდა. რამდენიმე საათით დატბორილი იყო ბათუმის ცენტრალური უბნებიც, ბათუმის მერიის ა(ა)იპ “სატრანსპორტო ინფრასტრუქტურის მართვის სააგენტოს” თნამშრომლები კი სტიქიის შედეგად დაზიანებული ქვაფენილის აღდგენას ცდილობენ.
ჯერჯერობით უცნობია რა რაოდენობის ზარალი მიადგა მოქალაქეებს ძლიერი წვიმის დროს.
