ხელშეკრულების თანახმად, რომელიც ბათუმის მერიამ და კომპანია “ფაიფერი და ფაიფერმა“ 27 აგვისტოს გააფორმეს, მახინჯაურში აშენდება წყლის სამარაგო რეზერვუარი, თამარის დასახლებასა და ბარცხანაში – საკანალიზაციო სატუმბი სადგურები, სადაც განხორციელდება წყლისა და საკანალიზაციო სისტემის სრული რეაბილიტაცია. ასევე მოხდება საკანალიზაციო ქსელის რეაბილიტაცია ბარცხანაში, წყლის სისტემის რეაბილიტაცია ანგისაზე და საკანალიზაციო სისტემის ქსელის გაფართოება გონიოში.
განხორციელდება საწნევო და თვითდენითი მაგისტრალური ხაზების მშენებლობა და სამომხმარებლო ქსელის მოწყობა.
აღნიშნული მონაკვეთების საკანალიზაციო სისტემა შეუერთდება ქალაქის ერთიან ქსელს და გამწმენდი ნაგებობის გავლის შემდეგ მოხდება მისი ზღვის სიღრმეში ჩაღვრა.
სამუშაოების ღირებულება – 14 მილიონ 864 ათას ევროს შეადგენს, რაც KfW-ს სესხით, გრანტითა და ადგილობრივი კონტრიბუციით ფინანსდება.
