Batumelebi | ბათუმის ავტოსადგურთან ორი მამაკაცი დაჭრეს ბათუმის ავტოსადგურთან ორი მამაკაცი დაჭრეს – Batumelebi
RU | GE  

ბათუმის ავტოსადგურთან ორი მამაკაცი დაჭრეს

 

მოსამართლე დავით მამისეიშვილის გადაწყვეტილებით, ხულოს მუნიციპალიტეტის ერთ-ერთ სოფელში მცხოვრები მოქალაქე დააპატიმრეს. აღკვეთი ღონისძიების შეფარდების დროს ბრალდებულის ადვოკატმა ბიძინა ბერიძემ მისი დაცვის ქვეშ მყოფი პირისთვის გირაოს გამოყენება მოითხოვა. მოსამართლემ მისი შუამდგომლობა არ დააკმაყოფილა.

 

 

როგორც სასამართლო პროცესზე პროკურორმა შოთა ხორავამ განმარტა, საქმის მასალების მიხედვით, ბათუმში, მაიკოვსკის ქუჩაზე, დაახლოებით ავტოსადგურის მიმდებარე ტერიტორიაზე ნასვამ მდგომარეობაში მყოფმა მამაკაცმა დანით იმის გამო დაჭრა თავისი ნათესავი, რომ ის მას არ მიესალმა. დაზარალებულს ხელის არეში მიყენებული აქვს ჭრილობები და ადევს ათი ნაკერი.

 

ორი მამაკაცის ჩხუბს შეესწრო გზაზე გამვლელი მოქალაქე, რომელმაც სცადა ბრალდებულისთვის დანის წართმევა, ბრალდებულმა კი ეს მოქალაქეც დაჭრა, ასევე ხელისა და სახის არეში. მეორე მოქალაქეს სახეზე ადევს ათი ნაკერი.
პროკურორის თქმით, ამ პროცესის დროს დაირღვა საზოგადოებრივი წესრიგი, შეფერხდა იქვე მომუშავე მაღაზიების მუშაობის პროცესი და ეს ამბავი სახელმწიფომ ისე შეაფასა, როგორც ხულიგნობა ჩადენილი ძალადობრივი გზით.
პროკურორის ინფორმაციით, ბრალდებული შემთხვევის ადგილიდანაც მიიმალა.

 

დაცვის მხარე გირაოს შეფარდებას ითხოვდა იმ არგუმენტით, რომ მამაკაცს ჰყავს სამი შვილი, მათ შორის ერთი მცირეწლოვანია. მოსამართლე დავით მამისეიშვილმა თქვა, რომ გირაოს შეფარდების საკითხს წინასასამართლო სხდომაზე ისევ განიხილავს, ამ ეტაპზე კი საპატიმრო სასჯელი გამოყენება იმით ახსნა, რომ საქმის მასალების მიხედვით ორი დაზარალებულია და ორივეს სხეულის დაზიანება აქვს მიღებული.
გამოძიება სისხლის სამართლის კოდექსის 239-ე მუხლის პირველი და მეორე ნაწილით მიმდინარეობს, რაც 4-დან 7 წლამდე პატიმრობას ითვალისწინებს. პროკურორმა თქვა, რომ ექსპერტიზის დასკვნის შემდეგ მუხლი შესაძლოა შეიცვალოს.

ნეტგაზეთის მასალების სხვა გამოცემებში გადაბეჭდვის წესი
ნათია როყვა