ნეტგაზეთი • RU

ბოტანიკურ ბაღში მცხოვრები ოჯახებისთვის ბათუმში ახალი სახლი აშენდა

 

ლერმონტოვის ქუჩაზე 5 სართულიან, 42-ბინიან საცხოვრებელ კორპუსში ორ კვირაში, ბოტანიკური ბაღის ტერიტორიაზე მცხოვრები მოსახლეობა გადავა. სახლი კომპანია „ატუ“-მ ბათუმის მერიის დაკვეთით ააშენა. მთავრობის ინფორმაციით სახლი სრულად კეთილმოწყობილია – ”ბინებში შეყვანილია წყალი, გაზი და ელექტროენერგია. ასევე მოწყობილია სველი წერტილები. დამონტაჟებულია სამზარეულოს ონკანები, აბაზანები და წყლის გამათბობლები. მოპირკეთებულია სამზარეულო და საპირფარეშოები. იატაკზე დაგებულია ლამინატი და ჩასმულია მეტალო-პლასტმასის კარ-ფანჯრები. ყველა სახლს და სადარბაზოს აქვს რკინის კარები.

 

 

სახლის ზედა ნაწილში კეთდება მანსარდა, რომელსაც მოსახლეობა საჭიროებისამებრ გამოიყენებს საერთო მოხმარებისთვის.

 

სახლს გააჩნია 2000 კვ/მ კეთილმოწყობილი ეზო, სადაც გაკეთებულია გამწვანება და ავტოსადგომები.

 

 

”ერთ კვირაში დასრულდება პროცედურული საკითხები და აგვისტოში უკვე ბარის ტერიტორიაზე მცხოვრებლებს კეთილმოწყობილ სახლში შევასახლებთ. ამ პროცესს მოსდევს ბაღის რეაბილიტაცია. უსახური სახლების დემონტაჟის შემდეგ ბაღის განვითარების ახალი პროექტი შემუშავდება. ბოტანიკური ბაღი არის სამეცნიერო კვლევებისთვის აუცილებელი ტერიტორია, სადაც მოსახლეობა არ უნდა ცხოვრობდეს. მთავარი იყო მშენებლობის დასრულება. სახლში, რომელიც მოსახლეობისთვის აშენდა, გათვალისწინებულია მათთვის სასურველი ფართი და კომფორტი,“ – აღნიშნა არჩილ ხაბაძემ, რომელმაც ახალი საცხოვრებელი კორპუსი დღეს მოინახულა

 

ორ, სამ და ოთხ ოთახიანი ბინების მფლობელები უკვე ცნობილია.

მოსახლეობასთან შეთანხმება წინასწარ შედგა და ფართები მათი მოთხოვნის შესაბამისად გადანაწილდა. 

ნეტგაზეთის მასალების სხვა გამოცემებში გადაბეჭდვის წესი
"ბათუმელები”