ნეტგაზეთი • RU

აჭარის რეგიონული განვითარების სტრატეგიაზე მუშაობის პირველი სამუშაო შეხვედრა

 

დღეს, აჭარის ფინანსთა და ეკონომიკის სამინისტროში, აჭარის რეგიონული განვითარების სტრატეგიაზე მუშაობის ფარგლებში პირველი სამუშაო შეხვედრა ჩატარდა. პრეზენტაცია დონორმა ორგანიზაცია GIZ-მა და საკონსულტაციო კომპანია PMCG-მ გამართეს. 



სამინისტროს ცნობით, ახალი ხუთწლიანი სტრატეგია 2016-2020 წლებზე იქნება გათვლილი. რეგიონული განვითარების სტრატეგიის დოკუმენტზე აჭარის ფინანსთა და ეკონომიკის სამინისტროს სპეციალისტები დონორი ორგანიზაცია GIZ-ს ფინანსური მხარდაჭერით იმუშავებენ, კონსულტაციას კი მათ საკონსულტაციო კომპანია PMCG-ი გაუწევს.


სტრატეგიაზე მუშაობის პირველი ეტაპი (სიტუაციის ანალიზი) ოქტომბერში დასრულდება და როგორც სამინისტრო იუწყება, სტრატეგიის დოკუმენტი ხელს შეუწყობს რეგიონის განვითარების პრიორიტეტული მიმართულებების სწორად განსაზღვრას. საბოლოო დოკუმენტი 2016 წლის თბერვალში მომზადდება. დღემდე არსებული სტრატეგია 2009-2014 წლებს მოიცავდა.



შეხვედრას ესწრებოდნენ: აჭარის ფინანსთა და ეკონომიკის მინისტრი დავით ბალაძე, აჭარის ჯანმრთელობისა და სოციალური დაცვის მინისტრი ნუგზარ სურმანიძე და აჭარის განათლების, კულტურისა და სპორტის მინისტრი გიორგი თავამაიშვილი.

ნეტგაზეთის მასალების სხვა გამოცემებში გადაბეჭდვის წესი
"ბათუმელები”