საბრძოლო მასალის ტარებისთვის დაკავებული თურქი ქალი: თავს დამნაშავედ არ ვცნობ


კასრში შენახული საბრძოლო მასალის უკანონო შენახვის ბრალდებით ქობულეთში დაკავებული თურქეთის მოქალაქის წინასასამართლო სხდომა დღეს, 17 იანვარს, იმართება. ქალს საბრძოლო მასალების უკანონოდ ტარება, შეძენა, შენახვას ედავებიან. 35 წლის ქალის – ფემბე ოზლემ ოლუნის საქმეს მოსამართლე გიორგი გრატიაშვილი განიხილავს.

გამოძიების ვერსიით, ბრალდებული იარაღს, მათ შორის, კალაშნიკოვის ტიპის ავტომატს ბათუმში, გორგილაძის ქუჩაზე ნაქირავებ ბინაში ინახავდა.

ბრალის არსში საუბარია ქობულეთში, სოფელ კვირიკეში მიწაში ჩაფლულ კასრზეც, სადაც, პროკურატურის ვერსიით, ფემბე ოლუნი ხელყუმბარას, კალაშნიკოვის ავტომატს და 115 ვაზნას ინახავდა.

თურქეთის მოქალაქე სპეცოპერაციის შედეგად სამართალდამცველებმა გასული წლის 25 ნოემბერს დააკავეს, სოფელ კვირიკეში მიწაში ჩაფლული იარაღი სწორედ მაშინ ამოიღეს.

„ბრალს არ ვაღიარებ,“ – უთხრა მოსამართლეს ფემბე ოლუნმა. მან რამდენჯერმე სცადა პროტესტის გამოხატვა, როცა მოსამართლე საბრალდებო დასკვნას კითხულობდა.

„ჯერ დავასრულებ იარაღის ჩამოთვლას. აქ იმდენი წერია, ასე შეიძლება დღეს ვერ დავამთავროთ…“ – ჩაილაპარა მოსამართლემ. მან ბრალის არსიდან ამოიკითხა, რომ ფემბე ოლუნს ქობულეთში, აღმაშენებლის ქუჩაზე, პირადი ჩხრეკის დროს ამოუღეს 40 ვაზნა და ერთი ხელყუმბარა.

გამოძიება თურქეთის მოქალაქეს საბრძოლო მასალის შენახვის გარდა მის უკანონო შეძენასაც ედავება, თუმცა საბრალდებო დასკვნის მიხედვით, მისი შეძენა “დაუდგენელ დროსა და ვითარებაში” მოხდა.

ფემბე ოზლემ ოლუნმა მოსამართლეს უთხრა ისიც, რომ მათემატიკის განხრით უმაღლესი განათლება აქვს, თუმცა ამჟამად არსად მუშაობს.

“ჩემი დაცვის ქვეშ მყოფი ამბობს, რომ მას იარაღთან შეხება საერთოდ არ ჰქონია,”- თქვა ადვოკატმა ლევან მამულაძემ. მან დაკავების დროს პროცედურულ დარღვევებზე გაამახვილა ყურადღება და თქვა, რომ დაკავების დროს ბრალდებულს თარჯიმნის არ ესმოდა. ადვოკატმა პროკურატურის მიერ წარმოდგენილი მტკიცებულებების დაუშვებლად ცნობა მოითხოვა.

ადვოკატს სიტყვა ბრალდებულმა გააწყვეტინა. მან თქვა, რომ თარჯიმნის არც ახლა ესმის და პროცესის გადადება მოითხოვა.

მოსამართლე გიორგი გრატიაშვილმა შუამდგომლობა არ დააკმაყოფილა იმ მოტივით, რომ თარჯიმანი სერტიფიცირებულია. საბოლოოდ პროცესის შეწყვეტა თავად თარჯიმანმა მოითხოვა ემოციური ფონის გამო.

შს სამინისტრომ კვირიკეში ასაფეთქებელი მოწყობილობის ამოღებაზე ინფორმაცია, თავის დროზე, ხუთი დღის დაგვიანებით გაავრცელა.

 

 

 

ნეტგაზეთის მასალების სხვა გამოცემებში გადაბეჭდვის წესი
ავტორი