ნეტგაზეთი • RU

ბათუმის საკრებულოს წევრი: მურმან დუმბაძე ქართული ოცნების ერთ-ერთი ყველაზე დიდი შეცდომაა

 

საკრებულოს წევრი ირაკლი მიქელაძე ტელეკომპანია რუსთავი2-ის ერთ-ერთი გადაცემის ანონსში გასულ, საქართველოს პარლამენტის წევრის ვიცე-სპიკერის მურმან დუმბაძის კომენტარს ეხმაურება, რომელშიც დუმბაძე, საკრებულოს თავმჯდომარეს ირაკლი ჭეიშვილს ნარკოტიკებით ვაჭრობაში სდებს ბრალს. მიქელაძის შეფასებით „მურმან დუმბაძის პროპაგანდა მთლიანად გუნდის წინააღმდეგ არის მიმართული, რომელსაც სათანადო სამართლებრივი და პოლიტიკური პასუხი გაეცემა”.

 

 

“დიდი ხანია არაფერი დამიწერია და ამას რა თქმა უნდა, თავისი სუბიექტური თუ ობიექტური მიზეზები ჰქონდა, მაგრამ ზოგჯერ დუმილი იმაზე მეტი დარღვევაა, ვიდრე რაიმე მოცემულობის არასწორი კონსტატირება. ის რაც “ყველაზე ობიექტური ტელევიზიის” ერთ-ერთი გადაცემის ანონსში ვნახე, ჩემთვის გახდა მთელი რიგი საკითხების განხილვის საფუძველი. რა თქმა უნდა ფაქტია, რომ მე ვერ გამოვდგები ვინმეს (თუნდაც ჩემი გუნდის წევრის) დამცველად, მაგრამ ჩემი შინაგანი რწმენა არ მომცემს იმის უფლებას, რომ ჩემივე სუბიექტური აზრი არ მოგახსენოთ ზემოაღნიშნულთან დაკავშირებით.

დავიწყოთ მარტივი მსჯელობა იმასთან დაკავშირებით, თუ რა გახდა მიზეზი ზოგადად ამ რეპორტაჟისა და კონკრეტულად მურმან დუმბაძის და მისი დამქაშების ასეთი არაჯანსაღი გააქტიურებისა. საქმე იმაშია, რომ გუშინ და დღეს არ დაწყებულა ეს დამოკიდებულება მურმან დუმბაძისა ირაკლი ჭეიშვილის და ზოგადად „ქართული ოცნებისადმი“. მიზეზი იმ პირველ უარშია, რომელიც უთხრეს “გამოცდილ პოლიტიკოსს” იმ სიმახინჯეებზე, რომლის დანერგვასაც ის ცდილობდა აჭარის პოლიტიკურ თუ ყოფით რეალობაში. სამწუხაროდ მურმანი არის „ქართული ოცნების“ ერთ-ერთი ყველაზე დიდი შეცდომა და ამ შეცდომის შედეგებს დღემდე ვიმკით. რა თქმა უნდა, ურჩევნია “პატივცემულ” მურმანს, როგორც ყველა ანტაგონისტს, დამბრალებლის პოზიციაში იყოს და ეძებოს მარტივი და სულელური გზები თავისი პოლიტიკური უმეცრების მისაჩქმალად, მაგრამ სამწუხაროდ ავიწყდება მას, რომ ჰომეროსიდან – ბეგბედერამდე არც ერთ უარყოფით გმირს არ მოუპოვებია საზოგადოების კეთილგანწყობა. თუმცაღა ბედის ირონია არსებობს ბუნებაში და ამის თვალსაჩინო მაგალითად ისიც საკმარისია, რასაც სტატუსი – ვიცე-სპიკერი ჰქვია. “პატივცემულ” მურმანს კი ავიწყდება, რომ სწორედ იმ ორგანოს წევრია, რომლის სახელთანაც არის დაკავშირებული ცნება – უდანაშაულობის პრეზუმცია. თუმცაღა ამ ცნებას არ შევეხები, რადგან მინდა დაგანახოთ – ვის და რაში სდებენ ბრალს. ირაკლი ჭეიშვილი, 33 წლის ახალგაზრდა და წარმატებული ადამიანია, რომლისთვისაც არათუ ნარკოტიკის არამედ ნიკოტინის და ალკოჰოლის მიღებაც კი არადამახასიათებელია. ამ თემის უფრო ფართოდ განხილვა საჭიროდ არ მიმაჩნია, ვინაიდან მურმანმა თავისი აზროვნება აბსურდის იმ ხარისხზე აიყვანა, რომ ეს ჩემთვის კი არა სემუელ ბეკეტისათვისაც კი მიუღწეველი სიმაღლეა. 

P.S –P.S -ის სიუჟეტზე:
1) ჩემი აზრით ეს კიდევ ერთხელ ცხადყოფს, რომ მურმან დუმბაძე თურქეთში ლევან ვარშალომიძეს მხოლოდ სამხრეთ კორეულ კინემატოგრაფზე არ ესაუბრა და მიიღო კონკრეტული მითითებები, კონკრეტული პიროვნებების წინააღმდეგ.

2) ამ შემთხვევაში ირაკლი ჭეიშვილი არის საკრებულოს და ზოგადად ქართული ოცნების კრებითი სახე და მურმანის ეს გებელსისეული პროპაგანდა მთლიანად გუნდის წინააღმდეგ არის მიმართული, რომელსაც სათანადო სამართლებრივი და პოლიტიკური პასუხი გაეცემა” – წერს თავის ფეისბუქგვერდზე მიქელაძე.

 

ნეტგაზეთის მასალების სხვა გამოცემებში გადაბეჭდვის წესი
"ბათუმელები“