ბათუმის საკრებულოს იურიდიულ და საპროცედურო საკითხთა კომისიის თავმჯდომარე, ლევან კინწურაშვილი, რომელიც ამავე დროს მერიაში მოქმედი ფიზიკური და კერძო სამართლის იურიდიული პირების, საკუთრების უფლების აღიარების მუდმივმოქმედი კომისიის თავმჯდომარეცაა, „ბათუმელებთან“ საუბარში აცხადებს, რომ გონიოს მოსახლეობაზე 2010 წლის 9 ნოემბერს მიღებული საქართველოს ხელისუფლების გადაწყვეტილებით ჩამორთმეული მიწის საკუთრების კანონიერების განხილვა, კომისიას ჯერ არ დაუწყია.
ლევან კუნწურაშვილის განცხადებით, კომისია გონიოს მიწებთან დაკავშირებული საკითხის განხილვას, საქართველოს მთავრობის გადაწყვეტილების გარეშე ვერ დაიწყებს:
„ჩვენ ადმინისტრაციული საქმის წარმოება გვაქვს დაწყებული მაგასთან დაკავშირებით, შესაბამისად, საქართველოს ეკონომიკისა და მდგრადი განვითარების სამინისტროს, ქონების ეროვნული სააგენტოსგან ველოდებით პასუხებს“.
ლევან კინწურაშვილი ამბობს, რომ ქონების მართვის სააგენტოს, კომისიამ სამი თვის წინ მიმართა, თუმცა პასუხი ჯერ არ მიუღიათ.
„ბუნებრივია, აქამდე უნდა მიგვეღო პასუხი, მაგრამ ასე მარტივად ვერ გადაწყვეტდა ამ საქმეს. ჩვენც მათ გარეშე ვერ დავიწყებთ განხილვას. ეს საკითხი მთავრობის ეკონომიკურ საბჭოზეც უნდა გავიდეს და მთავრობის სხდომაზეც. ამის შემდეგ მიიღება კონკრეტული გადაწყვეტილება“- ამბობს, ლევან კინწურაშვილი.
