Batumelebi | ენმ წევრი: „მოსახლეობას დეფეკაციური ტალახი 11-ჯერ ძვირად მიყიდეს“ ენმ წევრი: „მოსახლეობას დეფეკაციური ტალახი 11-ჯერ ძვირად მიყიდეს“ – Batumelebi
RU | GE  

ენმ წევრი: „მოსახლეობას დეფეკაციური ტალახი 11-ჯერ ძვირად მიყიდეს“

 

აჭარის უმაღლესი საბჭოს წევრის, „ნაციონალური მოძრაობიდან“ ირაკლი ბარამიძის განცხადებით, აჭარის სოფლის მეურნეობის სამინისტრომ გლეხებს ე.წ დეფეკაციური ტალახი, (ერთგვარი სასუქი) თვითღირებულებასთან შედარებით 11-ჯერ გაძვირებულ ფასად მიყიდა.  ირაკლი ბარამიძის აზრით, აღნიშნული ტენდერი კორუფციის ნიშნებს შეიცავს, მისი აზრით, სახელმწიფომ  მოსახლეობას გადახდილი თანხები უკან უნდა დაუბრუნოს.  

ირაკლი ბარამიძე

„ტენდერი  650 ათას ლარზე, გასული წლის ივნისში გამოცხადდა. გამარჯვებულად  632 ათასი ლარით, ინდმეწარმე  რეზო  დადიანი გამოვლინდა, რომელმაც პირველად მიიღო ტენდერში მონაწილეობა.

ჩვენი შემოწმებით, ერთი ტონა დეფეკაციური ტალახი დღევანდელი მონაცემებით, 10 ლარი ღირს. სატენდერო ფასით კი 1ტონა დეფეკაციური ტალახის ღირებულება, 79 ლარი გამოდის. ამას ემატება მოსახლეობის მიერ თანადაფინანსების ფარგლებში გადახდილი 30 ლარი, რაც ჯამში 240 ათას ლარს შეადგენს. აქედან გამომდინარე,  ინდეწარმემ 8 000 ტონა დეფეკაციური ტალახი 632 ათას ლარად შეიძინა,  მაშინ როცა მისი ფასი რეალურად 80 ათასი ლარია“- აცხადებს, ირაკლი ბარამიძე.

დეპუტატის განცხადებით, სახელმწიფომ დეფეკაციური ტალახის ღირებულება ხელოვნურად გაზარდა.

„ფაქტობრივად, 11-ჯერ გააძვირეს ტალახის თვითღირებულება. მე მაქვს კითხვები, რატომ დაუჯდა მოსახლეობას ის პროდუქტი, რომლის თვითღირებულება ერთ ტონაზე ადგილზე შეადგენს 10 ლარს, 109 ლარი?  რა სარგებელი მიიღო ან სახელმწიფომ ან გლეხმა ამ ტენდერით?

ვფიქრობ, სოფლის მეურნეობის სამინისტრომ კეთილი უნდა ინებოს  და დააბრუნოს მოსახლეობის მიერ გადახდილი 30 ლარი, რადგან ისედაც დიდი მოგება მიიღეს ამ ტენდერით“.

ირაკლი ბარამიძის განცხადებით, დეფეკაციური ტალახი დაახლოებით ორი ათასზე მეტმა მოსახლემ შეიძინა.

ნეტგაზეთის მასალების სხვა გამოცემებში გადაბეჭდვის წესი
ლელა დუმბაძე