„სააგენტოში გვითხრეს, რომ განცხადება საპენსიო ასაკის შესრულების შემდეგ, ანუ პირველ ივნისს უნდა დაგვეწერა და პირველ პენსიასაც არა ამ თვეში, არამედ ერთი თვის შემდეგ ავიღებ. ფაქტობრივად, ერთი თვის პენსია გვეკარგება“, – ამბობენ ისინი.
როდის უნდა მიმართოს საპენსიო ასაკის მქონე პირმა სოციალური მომსახურების სააგენტოს პენსიის მისაღებად?
სოციალური მომსახურების სააგენტოს აჭარის ფილიალის ხელმძღვანელის მოადგილე, რუსუდან სალუქვაძე „ბათუმელებთან“ აცხადებს, რომ მოქალაქემ სახელმწიფოს პენსიის მიღებასთან დაკავშირებით, საპენსიო ასაკის შესრულების შემდეგ უნდა მიმართოს:
„წინასწარ განცხადების დაწერას მნიშვნელობა არ აქვს, რადგან დადგენილების მიხედვით, მოქალაქე განცხადებას მას შემდეგ წერს, როცა უკვე შეუსრულდა საპენსიო ასაკი. ანუ განცხადების დაწერიდან, მომდევნო თვეს მიიღებს პენსიას“.
რუსუდან სალუქვაძე ამბობს, რომ ამის თაობაზე მოქალაქე ინფორმაციას მაშინ იღებს, როცა ის განცხადებით სააგენტოს მიმართავს.
„ზოგიერთ მოქალაქეს საპენსიო ასაკი თვის ბოლო რიცხვებში უსრულდება, ამიტომ ამ თვეში დაბადებულების მონაცემები გავაერთიანეთ და ივნისში დაბადებული ყველა პირი, პენსიას მომდევნო თვეში მიიღებს. გამონაკლისი შემთხვევები არ არსებობს, რადგან ეს ყველაფერი პროგრამულად ხდება“.
როგორც სააგენტოს წარმომადგენელი ამბობს, რამდენ პირს უსრულდება საპენსიო ასაკი, ამის ელექტრონული ბაზა არ არსებობს.
„წლის ბიუჯეტში რა თქმა უნდა დაახლოებითი თანხები გათვლილია, თუმცა ელექტრონული პროგრამები ახლა მზადდება. ეს ბაზა მიბმული იქნება პირად მონაცემებთან და სამომავლოდ ყველა პირს, ვისაც საპენსიო ასაკი შეუსრულდება, მექანიკურად დაენიშნება პენსია. ეს სამომავლო პროგრამა დამუშავების პროცესშია“.
2012 წლის სტატისტიკური მონაცემების მიხედვით, საქართველოში 673 183 ასაკით პენსიონერია. გასული წლის მონაცემები სოციალური მომსახურების სააგენტოს ვებ-გვერდზე არ დევს.
