ბრალდებულ მ.ბ.-ს წინასასამართლო სხდომაზე, 20 მაისს, ბრალდებულმა თქვა, რომ აღიარებს მისთვის წარდგენილ ბრალდებას _ პოლიციელებისთვის წინააღმდეგობის გაწევას. მოსამართლის კითხვაზე, დაკავებისას ხომ არ ჰქონია ადგილი არაადამიანურ ან დამამცირებელ მოპყრობას პოლიციელების მხრიდან, პატიმარმა უპასუხა, რომ ის დაკავების დროს სცემეს, დეტალები კი პროკურორს დაკითხვისას მოუყვა. „თქვენ იცით ამის შესახებ?“ – ჰკითხა მოსამართლემ პროკურორს. პროკურორმა განაცხადა, რომ მისი ინფორმაციით ამ საქმეზე გამოძიება დაწყებულია.
ბრალდებულის ადვოკატმა დავით კეკელიძემ მოსამართლეს უთხრა, რომ მას საქმეზე რაიმე დამატებითი მტკიცებულება არ მოუპოვებია, ხოლო პროკურორის მიერ მოპოვებულ ყველა მტკიცებულებას სადაოს არ ხდიდა. დაცვის მხარემ თქვა, რომ მათი სურვილია, საქმე არსებითი განხილვის გარეშე, საპროცესო შეთანხმებით დარსულდეს.
წინააღმდეგობა, მუქარა ან ძალადობა საზოგადოებრივი წესრიგის დამცველის ან ხელისუფლების სხვა წარმომადგენლის მიმართ სისხლის სამართლის კოდექსის 353-ე მუხლით კვალიფიცირდება. ამ მუხლის პირველი ნაწილი კი _ პოლიციის მუშაკის ან ხელისუფლების სხვა წარმომადგენლის მიმართ წინააღმდეგობას, საზოგადოებრივი წესრიგის დაცვისათვის ხელის შეშლა ჩადენილი ძალადობით ან ძალადობის მუქარით, ისჯება ჯარიმით ან თავისუფლების შეზღუდვით ვადით სამ წლამდე ან/და თავისუფლების აღკვეთით ვადით ორიდან ხუთ წლამდე.
„ბათუმელებს“ მთავარ პროკურატურაში განუმარტეს, რომ პატიმრის საჩივრის საფუძველზე ჩატარდა მოკვლევა, „თუმცა იმის გამო, რომ პატიმრის ცემის ფაქტი არ დადასტურდა, გამოძიება არ დაწყებულა“.
