Batumelebi | მედეა ვასაძე არჩილ ხაბაძეს ფინანსთა მინისტრის მოადგილის გადაყენებას სთხოვს მედეა ვასაძე არჩილ ხაბაძეს ფინანსთა მინისტრის მოადგილის გადაყენებას სთხოვს – Batumelebi
RU | GE  

მედეა ვასაძე არჩილ ხაბაძეს ფინანსთა მინისტრის მოადგილის გადაყენებას სთხოვს

 

აჭარის ავტონომიური რესპუბლიკის უმაღლესი საბჭოს დეპუტატი მედეა ვასაძე აჭარის მთავრობის თავმჯდომარეს არჩილ ხაბაძეს ფინანსთა და ეკონომიკის მინისტრის პირველი მოადგილის იონა წითელაძის თანამდებობიდან გათავისუფლების წინადადებით მიმართავს. ამის შესახებ მედეა ვასაძემ 20 მაისს გამართულ ბრიფინგზე განაცხადა. 

 

მედეა ვასაძე დღეს სასამართლოს გადაწყვეტილებას გამოეხმაურა. მისი თქმით, ბათუმის საქალაქო სასამართლომ „ბ.ნ.ქ“-ს ყოფილი დირექტორის ლევან ჯინჭარაძესა და ფინანსთა და ეკონომიკის სამინისტროს შორის სამინისტროს დაევალა ბათილად ცნოს ჯინჭარაძის სამუშაოდან დათხოვნის ბრძანების სამოტივაციო ნაწილი, რადგან მას არ დაუდასტურდა არც ერთი წარდგენილი ბრალდება. რაც შეეხება თანამდებობაზე მის აღდგენას, მედეა ვასაძის თქმით,  სასამართლომ ამ ნაწილში, სასარჩელო მოთხოვნა არ დააკმაყოფილა იმ მოსაზრებით, რომ საზოგადოების 100%-იანი წილის დამფუძნებელია სახელმწიფო და რომ რისკებზე პასუხისმგებლობა მოდის დამფუძნებელზე. 

 

„იმ ვითარებაში, როცა ლევან ჯინჭარაძეს დაუდასტურდა საზოგადოების კეთილსინდისიერად მართვა, საზოგადოების ინტერესებისათვის ზრუნვა და თითქმის გაკოტრების რეჟიმიდან ქარხნის ფინანსურ მოგებაზე გაყვანა, ცალსახად და კატეგორიულად ვაცხადებ, რომ ლევან ჯინჭარაძის მიმართ აჭარის ა.რ. მთავრობის თავმჯდომარის არჩილ ხაბაძის, ფინანსთა და ეკონომიკის მინისტრის დავით ბალაძის და სამინისტროს საწარმოთა მართვის განყოფილების უფროსის თამაზ ხაბაძის მხრიდან ადგილი ჰქონდა მის დევნას, რადგან ამ მაღალი თანამდებობის პირებს ლევან ჯინჭარაძე ხელს უშლიდა ქარხანაში კორუფციული სქემების დანერგვაში და რეალიზაციაში, რომელიც დღეს წარმატებით ხორციელდება.

 

აღნიშნულის დასტურად ვასაჯაროებ კიდევ ერთ ფაქტს – 2013 წელს, ჩემი დაჟინებული თხოვნით, რომ შემოწმებულიყო „ბ.ნ.ქ.“, ოფიციალური წერილით მივმართე აჭარის სახ. აუდიტს. იმავე წელს ჩატარდა შემოწმება, თუმც აღმოჩნდა, რომ ყველა ის დანაშაული, რომლებზედაც გვქონდა ვარაუდი და რაზედაც ქარხანას ბუღალტრულ ოპერაციებზე აუდიტისათვის ინფორმაცია ჰქონდა მიწოდებული, აუდიტის დასკვნაში არ აისახა, ანუ დაიმალა. სანაცვლოდ ორთვენახევარში რიგითი აუდიტორი იონა წითელაძე დაწინაურებული იქნა ჭარის ფინანსთა და ეკონომიკის მინისტრის პირველ მოადგილედ.

მოვუწოდებ აჭარის მთავრობის თავმჯდომარეს ბატონ იონა წითელაძის თანამდებობიდან გადაყენებისაკენ. აქვე მოვუწოდებ აჭარის უმაღლესი საბჭოს სახელისუფლებო გუნდს ამ საკითხის მიმართ მაინც პრინციპული პოზიციის დაჭერისაკენ“  – აცხადებს მედეა ვასაძე. დეპუტატის განცხადების ტექსტს უმაღლესი საბჭო ავრცელებს.  

 

„ბათუმელები“ აჭარის ფინანასთა და ეკონომიკის სამინისტროს პასუხს აღნიშნულ თემაზე მოკლე ხანში გამოაქვეყნებს. 

ნეტგაზეთის მასალების სხვა გამოცემებში გადაბეჭდვის წესი
"ბათუმელები"