Batumelebi | წალკის მუნიციპალიტეტიდან გამოსახლებული ხუთსულიანი ოჯახი დახმარებას ითხოვს [ვიდეო] წალკის მუნიციპალიტეტიდან გამოსახლებული ხუთსულიანი ოჯახი დახმარებას ითხოვს [ვიდეო] – Batumelebi
RU | GE  

წალკის მუნიციპალიტეტიდან გამოსახლებული ხუთსულიანი ოჯახი დახმარებას ითხოვს [ვიდეო]

 

წალკის მუნიციპალიტეტის სოფელ სამებაში მცხოვრები რამინ ლომიძის ხუთსულიანი ოჯახი პოლიციამ  საცხოვრებელი სახლიდან გამოასახლა. ის აჭარაში დაბრუნდა და ახლა მცირეწლოვან შვილებთან  ერთად ხელვაჩურის მუნციპალიტეტში, ე.წ. “ოცნების სახლში” შესახლდა. 

 

 

ეკომიგრანტი ამბობს, რომ  საცხოვრებელი სახლი ცხრა წლის წინ ადგილობრივი ბერძნის  გრიშა ჩიქნიზოვასგან შეისყიდა, თუმცა მისი ოფიციალურად გაფორმება ვერ შეძლო:

 

„ სახლის მეპატრონეს, მოწმეების თანდასწრებით 2  500  დოლარი გადავუხადე, დარჩენილი 1 500 დოლარი კი სახლის გაფორმების შემდეგ უნდა მიმეცა.  სახლის გადმოსაფორმებლად  ჩამოსვლა მას რამდენჯერმე ვთხოვე, მაგრამ მეუბნებოდა, რომ არ ეცალა. ახლა დაბრუნდა და ითხოვს, რომ სახლი დავუბრუნო“.

 

როგორც რამინ ლომიძე გვეუბნება, სახლის იურიდიული მეპატრონე სახლის საფასურის ნაწილის გადახდის ფაქტს არ უარყოფს: „ის, რომ თანხის ნაწილი გადახდილი მაქვს, პოლიციაშიც ადასტურებს, მაგრამ ამბობს, რომ ეს თანხა ქირავნობის იყო და არა შესყიდვის. ამიტომ იმ თანხის  დაბრუნებაზეც უარს ამბობს“.  

 

ადგილობრივი ხელისუფლება და პოლიცია, როგორც გამოსახლებული ეკომიგრანტი ამბობს, რამინ ლომიძეს სასამართლოში წასვლას ურჩევს:  „სასამართლო სანამ შედგება, თვეები გავა, მე კი მთელი ოჯახით გარეთ დამტოვეს“.   

 

რამინ ლომიძე ამბობს, რომ ოჯახმა ცხრა წლის წინ ხულოს მუნიციპალიტეტის სოფელი ბეღლები მეწყრული პროცესების გამო დატოვა. აჭარის ჯანდაცვისა და სოციალური მომსახურების მინისტრის მოადგილე რამაზ ჯინჭარაძე “ბათუმელებთან” საუბრისას, ამბობს, რომ წალკიდან გამოსახლებულმა ოჯახმა განცხადება, აჭარის ჯანდაცვის სამინისტროში უნდა დაწეროს, ეს უწყება კი განცხადებას თბილისში, დევნილთადა განსახლების სამინისტროში განსახილველად გააგზავნის, თუ დადგინდა, რომ ოჯახი სტიქიის დროსაა დაზარალებული სახელმწიფო მას სახლს შეუსყიდის.

ნეტგაზეთის მასალების სხვა გამოცემებში გადაბეჭდვის წესი
ნათია როყვა