ხულოს მერის, გოჩა მელაძის ინფორმაციით, ხანძარი სოფელ ტუნაძეებში ლოკალიზებულია, სახანძრო -სამაშველო ბრიგადები კი, ადგილზე კვლავ მუშაობენ.
„სამი საცხოვრებელი სახლიდან ერთ-ერთ საცხოვრებელ სახლში არავინ ცხოვრობდა და სახლი დროებით სასწავლო პროცესისთვის გამოიყენებოდა, ამ დროისთვის ორივე დაზარალებული ოჯახი უსაფრთხო ადგილზე გადავიყვანეთ. დილიდან მუშაობას დავიწყებთ იმისთვის, რომ ოჯახები დროებით ქირით დავაბინაოთ. რაც შეეხება სახლს, სადაც დროებით სასწავლო პროცესი ტარდება, სკოლის ინვენტარის ნაწილის გამოტანა და გადარჩენა მოხერხდა. განათლების სამინისტროს წარმომადგენლებთან ერთად ვიმსჯელებთ, რომ მოსწავლეები გადავანაწილოთ სხვადასხვა სკოლაში და საჭიროებისამებრ ბავშვების სკოლებში გადასაყვანად ტრანსპორტი გამოვუყოთ, სასწავლო პროცესი არ შეწყდება“, – ამბობს გოჩა მელაძე.
ხულოს სოფელ ტუნაძეებში დღეს, 6 საათზე ხანძარი მოულოდნელად გაჩნდა და სამი სახლი, ორი ბოსელი და ერთი ნალია დაიწვა.
