დღევანდელ სასამართლო სხდომას, ამ საქმის განხილვის პროცესში პირველად, დაზარალებულებთან ერთად მათი ოჯახის წევრებიც ესწრებიან. ყოფილი პატიმარი და ამჟამად დაზარალებული, მოსამართლე დავით მამისეიშვილს მოუყვა, რომ 41-ე საკანში იხდიდა სასჯელს და ხშირად გამხდარა მსხვერპლი:
„ვიცი ვეკუა იყო დირექტორი, მაგრამ მე ვეკუა ნანახი არ მყავს. საკანში შემოვარდებოდა ჯიქია. გადმოყრიდა ყველაფერს და ტანსაცმელზე ფეხებით დადიოდა… წამალს ვერ ვითხოვდით, გვეშინოდა. თუ ვინმე წამალს მოითხოვდა, საკნიდან გავყავდით და გვცემდნენ. ჩემი მოთხოვნაა დაისაჯოს აი ის (ჯიქიასკენ იშვერს ხელს) და ციხის დირექტორი…“
მოსამართლის კითხვაზე, თუ რამდენჯერ სცემეს, დაზარალებული პასუხობს – „მაგას ვინ დაითვლის“.
პროკურორ ირაკლი გაჩეჩილაძის კითხვაზე, უყვებოდა თუ არა პატიმარი ამის შესახებ სხვა ვინმეს (რაც ხდებოდა ციხეში) მოწმემ უპასუხა: „ვინც ამაზე ილაპარაკა, იმას უარესი დამართეს“.
საქმეს მოსამართლე დავით მამისეიშვილი განიხილავს.
ბათუმის ციხის პატიმრების წამების საქმეზე სასამართლომ 116 ადამიანი უნდა დაკითხოს. საქმის მასალების მიხედვით, ამ ეტაპზე 50 დაზარალებულია, მათ შორის ციხის თანამშრომლები და პატიმრები. მე-3 საპყრობილეს ყოფილი ხელმძღვანელები – ზაზა ჯიქია და გიორგი ვეკუა პატიმრობაში არ იმყოფებიან. ისინი გირაოს საფუძველზე გაათავისუფლა მოსამართლემ.
