ნეტგაზეთი • RU

დაანონსებული 50-მილიონიანი ინვესტიცია აჭარაში

 

აჭარის მთავრობასთან დადებული შეთანხმების შესაბამისად, დაახლოებით ორ თვეში შპს „რეკან გრუპ ჯორჯიამ“ ბათუმში, კახაბრის უბანში, მრავალფუნქციური კომპლექსის მშენებლობა უნდა დაიწყოს. აჭარის მთავრობასთან დადებული შეთანხმების თანახმად, კომპანიამ აიღო ვალდებულება მშენებლობა სამ წელში დაასრულოს და შენობის ექსპლუატაციაში შეყვანიდან ხუთი წლის განმავლობაში დაასაქმოს 499 პირი, რომელთაგან 80% საქართველოს მოქალაქე იქნება.

 

„რეკან დრუპ ჯორჯია“ შემოსვლისა და 50-მილიონიანი ინვესტიციის განხორციელების პირობის შესახებ აჭარის ფინანსთა და ეკონომიკის მინისტრმა დავით ბალაძემ ორი კვირის წინ სასტუმრო „რადისონში“ გამართულ პროექტების პრეზენტაციაზე გააკეთა კომენტარი, თუმცა მინისტრი მაშინ მხოლოდ მცირე ინფორმაციით შემოიფარგლა.

 

კომპანიამ ბათუმის ახალ ბულვარში მრავალფუნქციური კომპლექსის ასაშენებლად ნაკვეთი აჭარის მთავრობის თავმჯდომარისგან, პირადაპირი წესით, სამი მილიონ დოლარად და გარკვეული ვალდებულებებით მიიღო.

 

შეთანხმების თანახმად, კომპანიამ ხელშეკრულების გაფორმებიდან 36 თვის ვადაში მრავალფუნქციური შენობა-ნაგებობის დასრულება და ექსპლუატაციაში შეყვანა, შენობა-ნაგებობის არანაკლებ 7700 კვ.მ ფართობში სასტუმრო კომპლექსის განთავსება, არანაკლებ 39 000 კვ.მ ფართობში აპარტამენტების განთავსება, არანაკლებ 5000 კვ.მ-ში კომერციული ფართობის განთავსება და არანაკლებ 13400 კვ.მ-ზე არანაკლებ 400 ავტომანქანაზე გათვლილი, დახურული ტიპის ავტოპარკინგის მოწყობა უნდა დაასრულოს.

 

აჭარის ფინანსთა და ეკონომიკის სამინისტროს ინფორმაციით, პროექტში არანაკლებ 50 მილიონი აშშ დოლარის ექვივალენტი ლარის ინვესტიცია განხორციელდება.

საჯარო რეესტრის მონაცემების მიხედვით, კომპანია საქართველოში 2014 წელს დარეგისტრირდა და მისი მეპატრონე ერაყის მოქალაქე აჰმედ ალი აზეეზია.
ცაგო კახაბერიძე

ნეტგაზეთის მასალების სხვა გამოცემებში გადაბეჭდვის წესი
ცაგო კახაბერიძე