დღეს, 17 ნოემბერს, ბათუმის დემოკრატიული ჩართულობის ცენტრში შეხვედრა-დისკუსია გაიმართა სადაც ,,ფონდმა ნატახტარმა“ და „კოალიციამ ბავშვებისა და ახალგაზრდებისთვის“ აჭარის რეგიონის დაინტერესებულ მხარეებს: არასამთავრობო ორგანიზაციებს, თვითმმართველობის ორგანოებს, ბიზნესისა და მედიის წარმომადგენლებს ერთობლივი პროგრამა წარუდგინა.
თანამშრომლობის მემორანდუმი კომპანია „ნატახტარსა’’ და „კოალიცია ბავშვებისა და ახალგაზრდებისთვის“ შორის 2017 წლის ივლისში გაფორმდა. თანამშრომლობის მიზანი სახელმწიფო ზრუნვის სისტემის მიღმა დარჩენილი ახალგაზრდების მხარდაჭერაა.
,,ფონდი ნატახტარი“ და „კოალიცია ბავშვებისა და ახალგაზრდებისთვის“ რეგიონებში ადვოკატირების კამპანიას აგრძელებს.
პროგრამის შემუშავების პროცესში აქტიურად მონაწილეობდნენ სახელმწიფო სტრუქტურები, შრომის, ჯანმრთელობისა და სოციალური დაცვის სამინისტრო, მთავრობის ადმინისტრაცია. პროგრამა რამდენიმე თავისგან შედგება, რომელიც მუნიციპალიტეტებისთვის მათ ტერიტორიაზე რეგისტრირებულ ბენეფიციართა დამხმარე სახელმძღვანელოს წარმოადგენს.
მცირე საოჯახო ტიპის სახლების მოზარდებთან „ფონდი ნატახტარი“ 2011 წლიდან მუშაობს. ექვსი წლის განმავლობაში 757 864 ლარი შეგროვდა და სულ 307 ბენეფიციარს გაუწიეს მომსახურება.
ფონდის სამოქმედო პროგრამა ოთხ ძირითად მიმართულებას მოიცავს:
ფსიქოლოგიური დახმარება
განათლება, პროფესიული საქმიანობის შესწავლის უზრუნველყოფა
სტიპენდია
დასაქმება
ფონდ „ნატახტარის“ საზოგადოებასთან ურთიერთობის მენეჯერი, ნინო სურმავა გვიხსნის, როგორ მუშაობს პროგრამა პრაქტიკაში:
„ლიმონათი ნატახტარის გაყიდული ბოთლებიდან 1, 5 და 3 თეთრი ირიცხება ფონდში (ლიმონათის დიდი, პატარა და საშუალო ბოთლების ღირებულებიდან). ამ თანხას განკარგავს ასოციაცია „ჩვენი სახლი საქართველო“ და მცირე საოჯახო ტიპის აღსაზრდელებს 15 წლიდან ეხმარება. პირველ ეტაპზე ბენეფიციარებთან მუშაობენ ფსიქოლოგები, რომლებიც მოზარდის უნარებს, საჭიროებებს განსაზღვრავენ და შეიმუშავებენ ინდივიდუალურ გეგმას ახალგაზრდების დასახმარებლად. შემდეგ ეტაპზეა განათლება. ვიღაცას შეიძლება ჰქონდეს ჩავარდნები სკოლაში და ვეხმარებით სირთულეების დაძლევაში, ვისაც უმაღლესი განათლების მიღება სურს, უზრუნველვყოფთ მათ რეპეტიტორებთან გადამზადებას. თუ პროფესიულ მიმართულებას ირჩევენ, მათთვის გვაქვს საშუალება კოლეჯებში გააგრძელონ სწავლა ან ვპოულობთ ხელოსანს, რომელმაც იცის ესა თუ ის კონკრეტული საქმე.
სტიპენდიაში იგულისხმება ბენეფიციარებისთვის გადარიცხული თანხა, რომლებმაც დატოვეს მცირე საოჯახო ტიპის სახლები და ჯერ არ აქვთ სამსახური, თავშესაფარი. სტიპენდია ფარავს ბინის ქირის, კომუნალური გადასახადებისა და სამგზავრო ხარჯებს. შემდეგ, ცხადია, ფსიქოლოგი ჩართულია აქტიურად, რომ ბენეფიციარებმა იპოვონ სამსახური, განივითარონ უნარები და არ იყვნენ მუდმივად მხოლოდ სტიპენდიის მოლოდინში. ბენეფიციართა დახმარება-გააქტიურების პროგრამა უზრუნველყოფს იმას, რომ სახელმწიფოს მიერ ამ ადამიანების 18 წლის ასაკამდე გაღებული ხარჯები ფუჭად არ ჩაივლის, ისინი აქტიურ, საზოგადოებისთვის სარგებლის მომტან მოქალაქეებად ჩამოყალიბდებიან და არ დარჩებიან მუდმივად სტიპენდიის მომლოდინე ბენეფიციარებად“.
ნინო სურმავა. „ნატახტარის” საზოგადოებასთან ურთიერთობის მენეჯერი”
ფონდი ადგილობრივ თვითმმართველობებს საქმიანობაში ჩართვას სთავაზობს. თანამშრომლობის საფუძველზე იგეგმება სახელმწიფოს ზრუნვის სისტემიდან გასული 18 დან 24-წლამდე ახალგაზრდების საჭიროებების შესწავლა, მონიტორინგისა და ინტერვენციის დაგეგმვა. ადგილობრივი თვითმმართველობის პასუხისმგებლობა შეიძლება გამოიხატოს საცხოვრებლის დაქირავებით, კომუნალური გადასახადების და სამგზავრო შეღავათების დაწესებით.
9 და 16 ნოემბერს შეხვედრა-დისკუსიები გორის, ახალციხის, თელავის, რუსთავის, ქუთაისისა და ოზურგეთის ადგილობრივი თვითმმართველობის ორგანოებთან, არასამთავრობო ორგანიზაციებთან და ბიზნესწარმომადგენლებთან მოეწყო. გაიმართა დისკუსია მზრუნველობის სისტემის მიღმა დარჩენილი ახალგაზრდების მხარდაჭერის საკითხებზე. მოეწყო ახალი პროგრამის პრეზენტაცია და განიხილეს რეგიონში არსებული ვითარება.
ადვოკატირების კამპანიის ფარგლებში დაგეგმილი შეხვედრა-დისკუსიები 18 ნოემბერს, ზუგდიდში დასრულდება.
