მინისტრ დავით ბალაძის ინფორმაციით, კომპანიამ პროექტში ცვლილება შეიტანა და სააგენტოს ახალი პროექტით მიმართა:
„რაც შეეხება ასეთი პროექტებისთვის უარის თქმას, მე ვფიქრობ, რომ ყველა გულისყურით უნდა მოეკიდოს ინვესტიციას და უფრო მეტად ჩაერთოს, რადგან ასეთი პროექტებისთვის უარის თქმა არ გამოვა“.
სააგენტოს ხელმძღვანელის მირანდა ჩარკვიანის ინფორმაციით, ახალი პროექტით სააგენტოსთვის კომპანიას ჯერ არ მიუმართავს:
„საქმე ადმინისტრაციულ წარმოებაშია. მე უკვე მქონდა კონტაქტი კომპანიის წარმომადგენლებთან და ჩემი პასუხი იყო, რომ უნდა ვიპალარაკოთ, მაგრამ ახალი პროექტი ჯერჯერობით არ არის სააგენტოში. სააგენტომ ერთხელ უკვე უთხრა უარი კომპანიას, მან გაასაჩივრა ეს უარი სამინისტროში. ერთხელ უკვე იყო ადმინისტრაციული მოსმენა, რაც გრძელდება“, – უთხრა აჭარის კულტურული მემკვიდრეობის სააგენტოს ხელმძღვანელმა „ბათუმელებს“.
ბათუმში, მემედ აბაშიძის ქუჩაზე, #1 აფთიაქის ყოფილ შენობაში ინვესტორი 11 სართულიანი სასტუმროს და სამორინეს განთავსებას გეგმავს. მინისტრ დავით ბალაძის ინფორმაციით, ინვესტორი 15 მილიონი ლარის ინვესტიციას განახორციელებს. მშენებლობა 2017 წელს უნდა დასრულდეს.
შპს „ჟასმინი“ 2011 წელს თურქეთის მოქალაქემ დააფუძნა. კომპანიასა და აჭარის მთავრობას შორის ყოფილი აფთიაქის შენობის ადგილას სასტუმროს მშენებლობასთან დაკავშირებით შეთანხმება 2012 წელს შედგა. ამის შემდეგ კომპანიას მშენებლობის ნებართვა უნდა მოეპოვებინა. შპს „ჟასმინი“ ერთ-ერთია მათ შორის, რომელსაც აჭარის მთავრობამ გასულ წელს საგადასახადო დავალიანება ჩამოაწერა.
