მერიის ცნობით, აღნიშნული პროექტის ფარგლებში, ჩაქვის წყლის სამარაგო რეზერვუარების მშენებლობა იწყება, რაც ჩაქვის მოსახლეობისთვის წყლის თვითდენით მიწოდებას უზრუნველყოფს. სამუშაოებს ჩაქვში დღეს ბათუმის მერი გიორგი ერმაკოვიც ესწრებოდა.
პროექტში ასევე გათვალისწინებულია მწვანე კონცხისა და მახინჯაურის მოსახლეობის წყალმომარაგების სისტემების რეაბილიტაცია.
პროექტი ევროკავშირის საგრანტო ფონდის დაფინანსებით ხორციელდება და მისი ღირებულება 6 მილიონ 100 ათას ევროს შეადგენს. სარეაბილიტაციო სამუშაოები 2017 წლის II კვარტლისთვის დასრულდება.
