ავტოსაგზაო შემთხვევის შედეგად დაშავებული მოქალაქეები საავადმყოფოებში რჩებიან. რესპუბლიკური საავადმყოფოს ადმინისტრაციის ინფორმაციით, ამ დროისთვის, სამი ადამიანი გადის ამბულატორიულ მკურნალობას, ერთი დაშავებულის მდგომარეობა კი მძიმეა, მას ქალა-ტვინის დახურული ტრავმები აღენიშნება და რეანიმაციულ განყოფილებაში რჩება.
ორი ადამიანი ბათუმის საუნივერსიტეტო კლინიკაში გადის სტაციონალურ მკურნალობას. „ისინი ნეიროქირურგიულ მკურნალობას გადიან“ – გვეუბნებიან საავადმყოფოში.
ავტოსაგზაო შემთხვევა გუშინ ღამით, ჩაქვის გვირაბთან მოხდა. ერთმანეთს ორი მსუბუქი ავტომობილი დაეჯახა, შედეგად ერთ-ერთი მანქანა ამოტრიალდა და გზის სავალი ნაწილიდან გადავარდა. ავარიის შედეგად სულ 6 ადამიანი დაშავდა.
შინაგან საქმეთა სამინისტროს ინფორმაციით მომხდარზე გამოძიება სს კოდექსის 276-ე მუხლის პირველი ნაწილით დაიწყო.
