ბათუმის საარჩევნო ოლქს საარჩევნო დარღვევების განხილვა მაინც მოუწევს. ბათუმის საქალაქო სასამართლოს მოსამართლეების: ჯუმბერ ბეჟანიძის და ლაშა თავართქილაძის მიერ მიღებული გადაწყვეტილებები ქუთაისის სააპელაციომ სასამართლომ დღეს, 28 ოქტომბერს გააუქმა.
საუბარია არასამთავრობო ორგანიზაციების „სამართლიანი არჩევნების“ და „ახალგაზრდა იურისტთა ასოციაციის“ მიერ არჩევნების დღეს დაწერილ საჩივრებზე, რომლის განხილვაზეც ბათუმის ოლქმა უარი თქვა. ოლქი საარჩევნო კოდექსის იმ ჩანაწერს დაეყრდნო, რომლის მიხედვითაც აღმოჩენილ დარღვევებზე საჩივარი დაუყოვნებლივ უნდა დაიწეროს. არასამთავრობო ორგანიზაციების განმარტებით კი, დაუყოვნებელი საჩივრის დაწერა სავალდებულო უბანზეა და არა ოლქში.
ბათუმის ოლქის პოზიცია სრულად გაიზიარა ბათუმის საქალაქო სასამართლომ. ჯუმბერ ბეჟანიძის და ლაშა თავართქილაძის მიერ მიღებული გადაწყვეტილებები „ახალგაზრდა იურისტთა ასოციაციამ“ და „სამართლიანმა არჩევნებმა“ ქუთაისის სააპელაციო სასამართლოში გაასაჩივრა. მოსამართლეებმა მურთაზ მეშველიანმა, გოჩა აბუსერიძემ და ხათუნა ხომერიკმა ადმინისტრაციული საჩივარი ნაწილობრივ დააკმაყოფილეს.
„სააპელაციო სასამართლომ მიიჩნია, რომ საარჩევნო ოლქმა უნდა განიხილოს საჩივრები, რაც ითვალისწინებს დისციპლინური პასუხისმგებლობების დაკისრებას. არ დაკმაყოფილდა მხოლოდ უბნის შედეგების ბათილად ცნობის მოთხოვნა. ასეთი მოთხოვნა ჩვენს ორგანიზაციას მხოლოდ ორ უბანზე ჰქონდა,“ – ამბობს გიორგი ხიმშიაშვილი, „ახალგაზრდა იურისტთა ასოციაციის“ აჭარის ფილიალის ხელმძღვანელი.
ანალოგიურად დაკმაყოფილდა „სამართლიანი არჩევნების“ მოთხოვნაც. ბათუმის ოლქი ვალდებულია ორი დღის ვადაში განიხილოს ამ ორგანიზაციის საჩივრებიც, რადგან ქუთაისის სააპელაციო სასამართლოს მიერ მიღებული გადაწყვეტილება საარჩევნო დავებზე აღარ საჩივრდება.
„სამართლიანი არჩევნების“ აჭარა-გურიის კოორდინატორი, მადონა ბერიძე ამბობს, რომ დღეს, 28 ოქტომბერს, ბათუმის საქალაქო სასამართლოში მოსამართლე ჯუმბერ ბეჟანიძემაც დააკმაყოფილა კიდევ ერთი სარჩელი.
„ჩვენ მოვითხოვდით მე-6 უბნის თავმჯდომარისთვის და მდივნისთვის დისციპლინური პასუხისმგებლობის დაკისრებას. ამ უბნის შემაჯამებელ ოქმს აკლდა რეკვიზიტები: თარიღი, დრო… საოლქო კომისია ამტკიცებდა, რომ არ აკლდა და ოქმი, რომელიც მათ ჩაჰბარდათ, სრულად იყო შევსებული. ჩვენმა დამკვირვებელმა უბნიდან წამოიღო შემაჯამებელი ოქმის ასლი, სადაც ეს რეკვიზიტები არ იყო. მოსამართლე ჯუმბერ ბეჟანიძის გადაწყვეტილებით, ბათუმის ოლქი ვალდებულია ხელახლა განიხილოს ეს საკითხი და დააკისროს კომისიას შესაბამისი დისციპლინური პასუხისმგებლობა,“ – აღნიშნავს მადონა ბერიძე.
ამავე თემაზე:
