არასამთავრობო ორგანიზაცია „დემოკრატიის ინსტიტუტმა“ ქედაში, არასამთავრობო ორგანიზაციების კამპანიის – „ევროპა სახლიას“ ფარგლებში მოსახლეობასთან საინფორმაციო შეხვედრა გამართა და ადგილობრივ მოსახლეობას ევროპის ქვეყნებში უვიზო მიმოსვლასთან დაკავშირებით დეტალური ინფორმაცია გააცნო.
საინფორმაციო შეხვედრაზე, რომელიც „დემოკრატიის ინსტიტუტის“ ქედის ოფისში ჩატარდა, ოფისის მენეჯერმა, დავით ანანიძემ, შეხვედრის მონაწილეებს ევროპაში გასამგზავრებლად საჭირო დოკუმენტებზე ესაუბრა. მან ყურადღება გაამახვილა უვიზო მიმოსვლის სასარგებლო მხარეებსა და შესაძლო საფრთხეებზე, იმ შემთხვევაში, თუ მოქალაქეები ევროპის ქვეყნებში უნებართვოდ დარჩებიან.
„არის მითები, რომ მოსახლეობა ვერ შეძლებს ევროპის ქვეყნებში მოგზაურობას. ჩვენ, სამოქალაქო სექტორი, ვცდილობთ, მოსახლეობას უვიზო მიმოსვლასთან დაკავშირებით სრულყოფილი ინფორმაცია მივაწოდოთ, თუ როგორ შეძლებენ გამგზავრებას, რა სჭირდებათ ამისთვის, რა საფრთხეების შემცველია კანონის დარღვევა, კამპანიის ფარგლებში ჩვენს ორგანიზაციას, ნოემბრის თვის დასაწყისში, მსგავსი საინფორმაციო შეხვედრის ჩატარება გვაქვს დაგეგმილი ხულოშიც“ – ამბობს დავით ანანიძე.
ტრენინგის მონაწილეებს ქედაში, ევროპის ქვეყნებში უვიზო მიმოსვლასთან დაკავშირებით სპეციალურად დამზადებული საინფორმაციო ბროშურები დაურიგდათ.
კამპანია „ევროპა სახლია“ იმართება, ევროპულ და ევროატლანტიკურ სტრუქტურებში ინტეგრაციის საკითხებში საქართველოს სახელმწიფო მინისტრის აპარატთან და საინფორმაციო ცენტრთან ნატოსა და ევროკავშირის შესახებ პარტნიორობით. კამპანიის მხარდამჭერები არიან: ევროკავშირი, ,,ღია საზოგადოების ფონდები“ და სს ,,ლიბერთი ბანკი,“ ხოლო მისი განმახორციელებლები არიან: არასამთავრობო ორგანიზაცია ,,სიდა“ და სამოქალაქო საზოგადოების რეგიონული ქსელი (R-CSN).
