ბათუმში ოპოზიციის წარმომადგენელთა დაპატიმრებების სერია გრძელდება. 20 თებერვალს დემოკრატიული აჭარის ბათუმის ოფისის ლიდერს ჯელალ ქიქავას აკავებენ. მას ბრალად იარაღის უკანონო ტარება და ხულიგნობა ედება.
ჯელალ ქიქავას მამა იზეთ ქიქავა „აღორძინების“ მხარდამჭერების გააფთრებულ შეტევას მის საცხოვრებელ სახლზე, ასლან აბაშიძის პერსონას უკავშირებს: „მე და ასლანი ერთად გავიზარდეთ. ბავშვობა და ყრმობა ერთად გვაქვს გატარებული. აბაშიძეების ოჯახთან ყოველთვის კარგი ურთიერთობა გვქონდა. ასლან აბაშიძე ახლა არასწორ პოლიტიკურ კურსს ადგას. ნორმალურ ადამიანებთან ურთიერთობას კრიმინალური გარემოცვა ურჩევნია და თავადაც კრიმინალს სჩადის, ამიტომაც ჩვენი მხრიდან მხილება არ გვაპატია“.
ჯელალ ქიქავას (რომელიც ამ ორგანიზაციის ოფისის დარბევის პარალელურად სპეცდანიშნულების რაზმმა აიყვანა), სასამართლომ იარაღის უკანონო ტარებისა და ხულიგნობის მუხლების ბრალდებით 3-თვიანი წინასწარი პატიმრობა შეუფარდა. ქიქავას ადვოკატი ირაკლი გაფრინდაშვილი აცხადებს, რომ იარაღის შენახვის შესახებ ნებართვა ქიქავაზე საქართველოს შს სამინისტროს მიერ არის გაცემული, რომელსაც სულ მალე წარუდგენს გამოძიებას.
სახლში, რომელშიც „დემოკრატიული აჭარას“ ოფისი იყო განთავსებული, ქიქავების რამდენიმე ოჯახი ცხოვრობს. „სახლს რომ მოადგნენ, გვაგინებდნენ დედას, მკვდარს, ცოცხალს, ქიქავების ოჯახი ამოვწვიტოთ უნდაო. ეზოში ქვები ჩამოყარეს ჩვენი და აქ შემოფარებული ხალხის ჩასაქოლად. დაახლოებით 80 კაცი მოგვივარდა, ყველა მათგანს ხელში ჩაქუჩი ეკავა. ჯელალს გამაფრთხილებელი გასროლა რომ არ გაეკეთებინა და ის ხალხი აქ შემოსულიყო, სისხლისღვრა იქნებოდა“, – იხსენებს „გაზეთ ბათუმელებთან“ საუბარში იმ დღევანდელ ამბებს ჯელალ ქიქავას დედა ზოია აჯიმბა.
აღსანიშნავია ის ფაქტიც, რომ დამრბევმა რაზმმა ჯელალ ქიქავას სახლის წინ მდგარი მანქანა დაუმტვრია.
ამ ყველაფერთან დაკავშირებით შინაგან საქმეთა მინისტრი შემდეგ კომენტარს აკეთებს: „კრიტიკულ სიტუაციაში ქიქავას ოჯახი ნამდვილად დაიცვა პოლიციამ, რაც ქალაქის პოლიციის უფროსს ცემის ფასად დაუჯდა, სამწუხაროდ, მაგრამ ჩვენ მაინც დავიცავით ხალხი და ის სახლი, სადაც სერიოზული პროვოკაცია მოაწყო ქიქავამ. ნურავინ ნუ გამოიშვერს პოლიციისკენ ხელს, რადგან პოლიციამ იმ დღეს ბევრი ადამიანის სიცოცხლე გადაარჩინა. თანაც ეს კაცი გამომწვევად იქცეოდა. როცა ქვემოთ სროლა მოათავა, ზემოთ ავიდა, ისროდა და იგინებოდა. მშობლები აცხადებდნენ, რომ ბატონმა გია ბარამიძემ მისცა მას იარაღი და სროლის ნებართვა. მე ვესაუბრე ბატონ გიას, მან კატეგორიულად უარყო ეს ფაქტი. იარაღის ცნობა გაცემულია ყალბ საბუთებზე. მეორე ქვეგანყოფილებაში ერთ-ერთმა არაკეთილსინდისიერმა თანამშრომელმა, რომელსაც საერთოდ არ ეხებოდა აღნიშნული ცნობების გაცემა, გასცა ეს ცნობა. ეს საქმე გადაცემულია პირადი ინსპექციისათვის და მოკვლევა ჯერ არ დამთავრებულა. გამოიკვეთება ბრალეულობის საკითხები. ხელყუმბარის შენახვაზე ნებართვა არ გაიცემა და მისი უკანონო ტარება-შენახვა ისჯება მკაცრად, საქართველოს კანონმდებლობით“.
