Batumelebi | სასამართლოს თავმჯდომარეს სასამართლოში უჩივიან სასამართლოს თავმჯდომარეს სასამართლოში უჩივიან – Batumelebi
ნეტგაზეთი • RU

სასამართლოს თავმჯდომარეს სასამართლოში უჩივიან

ბათუმის საქალაქო სასამართლოს თავმჯდომარეს ავთანდილ ბეჟანიძეს ყოფილი ქვეშევრდომი, სასამართლოს კანცელარიის გამგე, ფატმან (იგივე დოდო) ლეონიძე სამსახურიდან უკანონო დათხოვნის გამო უჩივის და შრომის უფლების აღდგენას მოითხოვს.

ფატმან ლეონიძე თავის გათავისუფლებას სასამართლოს თავმჯდომარის პირად ამბიციებს უკავშირებს. „ავთო ბეჟანიძემ კანცელარიის გამგის სანაცვლოდ სხვა თანამდებობა შემომთავაზა. ოღონდ მაგ სკამზე ავთო აბაშიძეს ნუ დაენახვები, ყოველნაირად ხელს შეგიწყობ, როცა გინდა მოდი, როცა გინდა წადი, სხვა ადგილზე გადაგიყვანო. თუ დანაშაული ჩავიდინე, ცუდად ვმუშაობდი, მაშინ სხვა ადგილს რატომ მთავაზობდა. ამ საუბარს, სხვათა შორის, ბათუმის სასამართლოს მოსამართლეებიც ისმენდნენ“, – აცხადებდა ლეონიძე სასამართლო პროცესზე.

საყურადღებოა ლეონიძის სარჩელის მიმართ მოსამართლის მიერ გაკეთებული შეპასუხება: „…გათავისუფლება, რაც მიმართულია წესრიგისა და კანონიერების დასაცავად, შეესაბამება ასევე ავტონომიური რესპუბლიკის ტერიტორიაზე არსებულ მდგომარეობას“.

„რას ნიშნავს ეს? რადგან საგანგებო მდგომარეობაა გამოცხადებული, ამიტომ გამათავისუფლეს და ამით აღსდგა კანონიერება?!“ – კითხულობს განცვიფრებული ლეონიძე.

საქმის მასალებიდან ჩანს, რომ ლეონიძის გათავისუფლების ოფიციალური მიზეზი მოქალაქე ნაზი მუკუტაძე-ზოსიძის (ნაზი მუკუტაძე ჯემალ ზოსიძის ყოფილი მეუღლეა, ხოლო ფატმან ლეონიძე მისი ამჟამინდელი მეუღლე) განცხადება გამხდარა. ამ ქალბატონს 2003 წლის 18 ნოემბერს აჭარის უმაღლესი სასამართლოს თავმჯდომარისათვის მიუმართავს: „როგორც გადმომცეს, ჯემალ ზოსიძეს სასამართლოში ჰყავს მეგობარი ქალი, რომელიც შევალ თუ არა შენობაში, ფეხდაფეხ დამყვება, არ მაძლევს საქმის ნორმალურად წარმართვის საშუალებას და ჩემს შემდეგ ემუქრება თანამშრომლებს“.

პირველ დეკემბერს აღნიშნული განცხადება აჭარის უმაღლესი სასამართლოს თავმჯდომარემ, ავთანდილ აბაშიძემ ბათუმის საქალაქო სასამართლოს თავმჯდომარეს ავთანდილ ბეჟანიძეს გადაუგზავნა განსახილველად: „გთხოვთ, დეტალურად შეისწავლოთ განცხადებაში მოყვანილი ფაქტები და დადასტურების შემთხვევაში გააკეთოთ მკაცრი რეაგირება“.

საქალაქო სასამართლოს თავმჯდომარემ ოპერატიულად განიხილა და გამოიკვლია ეს საკითხი და ფატმან ლეონიძე მეორე დღესვე, 2 დეკემბერს, სამსახურიდან განთავისუფლა. „ეს კიდევ ერთხელ ადასტურებს იმ გარემოებას, რომ ლეონიძე ამ მომართვის საფუძველზე იქნა გათავისუფლებული. სასამართლოს თავმჯდომარემ ეტყობა კარგად ვერ გაიგო ამ მომართვის არსი. საქმეში არ არის წარმოდგენილი სასამართლოს თანამშრომლების არც ერთი ახსნა-განმარტება, რომელთაც თითქოს ფატმან ლეონიძე ემუქრებოდა“, – აცხადებს დაზარალებულის ადვოკატი ვალერი გიორგაძე.

საქალაქო სასამართლოს თავმჯდომარე მიუთითებს, რომ 2002 წლის 18 ივნისამდე ფატმან ლეონიძის მიერ თითქოსდა ჩადენილი სამსახურებრივი გადაცდენებისათვის იგი დასჯილი იქნა 79-ე მუხლის პირველი ნაწილით.

„შრომის კანონის 136-ე მუხლის მე-3 ნაწილით კი, დისციპლინარული სასჯელი არ შეიძლება დადებული იქნეს გადაცდომის ჩადენის დღიდან 6 თვის შემდეგ. იმავე მუხლის I ნაწილით დისციპლინარული სასჯელის დადებამდე შრომის დისციპლინის დამრღვევს უნდა მოეთხოვოს წერილობითი ახსნა-განმარტება, რაც ამ შემთხვევაში არ მომხდარა“, – აცხადებს ადვოკატი გიორგაძე და აქედან გამომდინარე გათავისუფლების უკანონობას ასკვნის.

დაზარალებული დარწმუნებულია, რომ ბათუმის სასამართლოს თავმჯდომარეს კანცელარიის გამგედ თავისი ახლო-ნათესავის დანიშნვა სურდა. „ის ხელმოსაჭიდს ეძებდა ჩემი გათავისუფლებისათვის, რომ საჩივარი დასაწერი არ მქონოდა. ჩემს თანამშრომელზე (ლელა გორგოშაძეზე) მითხრა, „მაგის მამა დადის თავმჯდომარესთან (იგულისხმება ავთანდილ აბაშიძე), მისთვის უნდა ეს ადგილი და რა ვქნაო“ – აცხადებს ლეონიძე.

დაზარალებული, ბათუმის საქალაქო სასამართლომ არ გაამართლა. ფატმან ლეონიძემ თავისი უფლებების დასაცავად ზემდგომ სასამართლო ინსტანციას მიმართა.

ნეტგაზეთის მასალების სხვა გამოცემებში გადაბეჭდვის წესი
ემზარ დიასამიძე