Batumelebi | დათო ხალვაში – ოქრუაშვილის პირველი მსხვერპლი აჭარაში დათო ხალვაში – ოქრუაშვილის პირველი მსხვერპლი აჭარაში – Batumelebi
RU | GE  

დათო ხალვაში – ოქრუაშვილის პირველი მსხვერპლი აჭარაში

ბოლო დროს საქართველოში ყველაზე პოპულარული კითხვა – ვინ  იქნება ოქრუაშვილის მორიგი მსხვერპლი – აჭარისთვისაც გახდა აქტუალური. აჭარაში გენპროკურორის პირველი მსხვერპლი ასლან აბაშიძის დაცვის უფროსი დათო ხალვაში, იგივე „ქელფეთა“ აღმოჩნდა. გენერალურმა პროკურატურამ მის წინააღმდეგ სისხლის სამართლის საქმე 26 იანვარს აღძრა, თუმცა პრესამ ეს ე.წ. პოლიციის კვირეულის დაწყებისას შეიტყო. საქმე ეხება დათო ხალვაშის ავტომანქანების ბიზნესს, რომელსაც ის თურქულ ფირმასთან ერთად  ეწეოდა. იმას, რომ ხალვაშს ჰქონდა ავტომანქანების ბიზნესი, აჭარის შინაგან საქმეთა მინისტრიც ადასტურებს. გოგიტიძე ამბობს, რომ არსებობდა გარკვეული უთანხმოება დათო ხალვაშსა და მის ბიძაშვილს შორის და გენერალურმა პროკურორმა, რომელიც თავის დროზე მისი ადვოკატი იყო, სწორედ ეს ფაქტი გამოიყენა. გოგიტიძე ამ საქმის აგორებას ოქუაშვილის პირად ინტერესებს უკავშირებს. თავად დათო ხალვაში, როგორც წესი კომენტარს არ აკეთებს, რაც შეეხება როსტომ ჯაფარიძეს, რომელიც მისი სიმამრია, ამბობს, რომ მისი სიძე წესიერი ადამიანია და რომ ამ საქმის თაობაზე თავადაც პრესით შეიტყო.

ხალვაშთან დაკავშირებით საკმაოდ მწვავე განცხადებებს აკეთებენ ოპოზიციური გაერთიანება „ჩვენი აჭარას“ წევრები. ისინი სწორედ დათო ხალვაშს უკავშირებენ ჩოლოქთან 24 ოქტომბერს დავით ბერძენიშვილის ცემის ფაქტს და ოპოზიციის აქციების დარბევებს. მათი განცხადებით, ასლან აბაშიძემ ხალვაში დაცვის უფროსად სწორედ ამ დამსახურებების გამო დააბრუნა.

ხალვაში, რომელიც ერთი პერიოდი სამაშველო სამსახურის უფროსი იყო, თავის დროზე ასლან აბაშიძემ გაათავისუფლა. ორიოდე კვირის წინ კი იგი ირაკლი აბაშიძეს ანთავისუფლებს და დაცვის სამსახურის უფროსად დათო ხალვაშს ნიშნავს.

როგორც ამბობენ, გენპროკურატურის დაინტერესება აბაშიძის დაცვის სამსახურის უფროსით მხოლოდ სამართლებრივი გადაწყვეტილება არ არის. უკვე საუბრობენ საქმის აღძვრის პოლიტიკურ მოტივებზე და იმაზე, რომ თბილისმა აბაშიძის სამხედრო რესურსების შესუსტებაზე ზრუნვა უკვე დაიწყო.

ნეტგაზეთის მასალების სხვა გამოცემებში გადაბეჭდვის წესი
ნესტან ცეცხლაძე