ქართულ-აფხაზურ მხარეთა წარმომადგენლები უსაფრთხოების გარანტიებთან დაკავშირებით შემდეგ შეხვედრას სოხუმში, 20 მაისს გამართავენ, – აცხადებს სოხუმის მთავრობის საგარეო საქმეთა მინისტრი სერგეი შამბა.
შამბას თქმით, აფხაზური მხარე ოფიციალურ თბილისთან კონსტრუქციულ დიალოგს იმედოვნებს.
შეხვედრაზე, რომელიც ქართულ-აფხაზური კონფლიქტის დარეგულირების საქმეში გაეროს გენმდივნის სპეცწარმომადგენლის ჰეიდი ტალიავინის ინიციატივით, სამშაბათს, თბილისში გაიმართა, მიიღეს გადაწყვეტილება მორიგ შეხვედრამდე კონსულტაციების გამართვასთან დაკავშირებით, რომელშიც საერთაშორისო ექსპერტები და ორივე მხარის წარმომადგენლები მიიღებენ მონაწილეობას, რაც თავის მხრივ, ჟენევაში, 22 აპრილს შედგება.
შეხვედრაზე, რომელიც თბილისში, 10 თებერვალს შედგა, ქართულ მხარეს განსაკუთრებულ საქმეთა მინისტრი მალხაზ კაკაბაძე, ხოლო აფხაზურს – სერგეი შამბა ხელმძღვანელობდა.
სერგეი შამბამ, მოლაპარაკებების შედეგებთან დაკავშირებით გამართულ ბრიფინგზე განაცხადა, რომ სოხუმში, თბილისთან იმ შეთანხმების მიღწევას იმედოვნებენ, რაც თავდაუსხმელობასა და საომარი მოქმედებების განუახლებლობას ეხება.
მისი თქმით, ეს აუცილებელია მხარეებს შორის ნდობის აღდგენასა და მოლაპარაკებების განახლებისათვის.
თბილისში აფხაზურ მხარესთან გამართულ მოლაპარაკებებზე, კოდორის ზემო ხეობის დემილიტარიზაციის საკითხი წამოიჭრა, ასევე, ამ ტერიტორიაზე დსთ-ს სამშვიდობოთა და საქართველოში გაეროს დამკვირვებელთა მისიის ერთობლივი საგუშაგოების განთავსება.
