მიხეილ სააკაშვილი რუსეთის პრეზიდენტ ვლადიმერ პუტინთან შეხვედრის წინ ოთხშაბათს დილით მოსკოვის ქართულ ეკლესიაში მოლაპარაკების წარმატებით ჩატარებისთვის ლოცულობდა. „დილით ჩვენ ქართულ ეკლესიაში დღევანდელი შეხვედრის წარმატებით ჩატარებისათვის ვლოცულობდით“ – განაცხადა საქართველოს პრეზიდენტმა რუს კოლეგასთან შეხვედრის წინ. როგორც სააკაშვილმა აღნიშნა, ის მადლობელია მოსკოვში მოწვევისათვის. „დიდი ხანია მქონდა ჩამოსვლის სურვილი და ძალიან მინდოდა, რომ ჩემი პირველი დიდი პოლიტიკური ვიზიტი მოსკოვში ყოფილიყო. საქართველოში ყველა დიდი იმედით უყურებს ჩემს ჩამოსვლას, თქვენს მოქმედებას და იმ კონკრეტულ ნაბიჯებს, რომელსაც რუსეთი საქართველოსკენ დგამს“, – განაცხადა მიხეილ სააკაშვილმა.
„ჩვენ ყოველ ფეხის ნაბიჯზე ვგრძნობთ თქვენს სტუმართმოყვარეობას, და ის ქართველები, რომლებიც რუსეთში ცხოვრობენ, ძალზე მადლობელი არიან იმ სითბოსა და სტუმართმოყვარეობისთვის, რომელსაც რუსი ხალხი მათდამი იჩენს“, – განაცხადა საქართველოს პრეზიდენტმა.
მისი თქმით, უბრალო ხალხის დამოკიდებულება რუსი ხალხისა და პირადად ვლადიმერ პუტინისადმი პოზიტიურია. „სასურველია, რომ ყველა არსებული სიძნელეები წარსულში დარჩეს“ – აცხადებს მიხეილ სააკაშვილი.
