1 თებერვალს ბათუმ-სხალთის ეპარქიის მთავარეპისკოპოსის რეზიდენციის იმ ნაწილს, სადაც ცხოვრობდნენ სასულიერო პირები, სასულიერო სემინარიის სტუდენტობა და რამდენიმე ოჯახი, ხანძარი გაუჩნდა. ხანძრის გაჩენის მიზეზი ეპარქიის წარმომადგენლის მათე ტაკიძის აზრით დაძველებული ელექტროსადენებია. „სხვა მიზეზი არ არსებობს. გავრცელებული ინფორმაცია უნიკალური ბიბლიოთეკის განადგურების შესახებ, სინამდვილეს არ შეესაბამება. დამწვარია წიგნების ის ნაწილი, რომელიც ყოველდღიურად ესაჭიროებოდათ იქ მცხოვრებთ. ასევე, დაიწვა ხატების რეპროდუქციები“.
რაც შეეხება შენობას, ის ავარიულ მდგომარეობაშია. პირველ სართულზე მცხოვრებ 7 ოჯახს ბათუმის მერია დააკმაყოფილებს საცხოვრებელი ფართით, ხოლო დამწვარი შენობა დაინგრევა და რეზიდენციის სკვერი გაკეთდება.
