გასულ კვირას საზარელი მკვლელობა მოხდა. პუშკინისა და გრიბოედოვის ქუჩების კვეთაში, დაუდგენელმა პირმა ცეცხლსასროლი იარაღიდან გასროლით მოკლა ხელვაჩაურში, აღმაშენებლის ქ.#40ა-ში მცხოვრები ბადრი დიასამიძე და მუცლის არეში სხეულის დაზიანება მიაყენა მის მამას ჯებრაელ დიასამიძეს, რომელიც მოთავსებულია რესპუბლიკურ საავადმყოფოში. მამა ამ თავდასხმის შემდეგ გადარჩა, თუმცა მისი მდგომარეობა ჯერ კიდევ არ არის სტაბილური და არ იძლევა დაკითხვის საშუალებას.
რა მოხდა ხუთშაბათს, დაახლოებით 20 საათზე ბენზინგასამართ სადგურთან. სავარაუდოდ 18-20 წლამდე ორი ახალგაზრდა ბენზინგასამართ სადგურში თავს დაესხა მამა-შვილს და „თქვენ რეებს მიჰქარავთ“ ძახილით რამდენჯერმე გაისროლეს. ამაზე მეტი ინფორმაცია ჯერჯერობით არ ვრცელდება. თავდაპირველად, გარდაცვლილის ოჯახის წევრებმა უნდობლობა გამოუცხადეს აჭარის ძალოვანებს და მათ ბათუმი-ახალციხის გზატკეცილი რამდენიმე საათით გადაკეტეს. ერთადერთი, რასაც დაღუპულის ახლობლები ითხოვდნენ, მკვლელის დაკავება იყო. „სამი დღე გავიდა და სამინისტროდან არც ერთი ადამიანი არ მოსულა, რომ რამე მოეკითხა. დიდი კაცის შვილი რომ იყოს, მკვლელს აქამდე დაიჭერდნენ. დღეს იარაღით ის დადის, ვისაც ფული აქვს. ჩვენ უნდობლობას ვუცხადებთ აჭარის პოლიციას და მოვითხოვთ, რომ საქმე კონტროლზე აიყვანოს გია ბარამიძემ“, – აცხადებდნენ დაღუპულის ოჯახის წევრები.
დაღუპულის ახლობლები ჯემალ გოგიტიძესთან შეხვედრასაც ითხოვდნენ, მაგრამ შს მინისტრი სასაუბროდ მათთან არ გასულა. გარდაცვლილის ახლობლებს არც ქალაქისკენ მსვლელობის საშუალება მისცეს. მათი დარწმუნება, რომ პოლიცია მაქსიმუმს გააკეთებს დამნაშავის გამოსავლენად, ახლადდანიშნულმა სისხლის სამართლის სამძებრო განყოფილების უფროსმა ნოდარ იაკობაძემ მოახერხა. დანარჩენზე პასუხისმგებლობა კი თავად აიღო.
მკვლელობიდან მე-6 დღეს ნოდარ იაკობაძე აცხადებს, რომ მათ ინტერესებშიც შედის მკვლელობის მაქსიმალურად მოკლე დროში გახსნა. მისივე თქმით, აქვთ ვერსიები, რაზეც პოლიცია მუშაობს, მაგრამ გამოძიების ინტერესებიდან გამომდინარე არფერს აკონკრეტებს.
ძიებისთვის განსაკუთრებით მნიშვნელოვანი იქნება თვითმხილველის, ჯებრაელ დიასამიძის ჩვენება. პოლიცია მის დაკითხვას ჯანმრთელობის მდგომარეობის და იმის გამო, რომ ავადმყოფი არ ფლობს ინფორმაციას შვილის დაღუპვის შესახებ, სრულყოფილად ვერ ახერხებს.
