„არის მომენტები, როცა სხვადასხვა, კონკურენტი საინფორმაციო საშუალებების წარმომადგენელთა ერთად დგომა უბრალო სოლიდარობის, მეტიც აუცილებლობის გამო არსებობს“ – მიიჩნევს საქართველოში მომუშავე ჟურნალისტთა ის ნაწილი, ვინც აჭარის ავტონომიური რესპუბლიკის წარმომადგენლობასთან აქცია გამართა.
საპროტესტო აქციის მიზეზი, ბოლო დროს აჭარაში მას-მედიის წარმომადგენლებზე გახშირებული ფიზიკური ანგარიშსწორების ფაქტები გახდა. საქართველოში მომუშავე ჟურნალისტები ამ გარემოების გამო აშკარა შეშფოთებას გამოთქვამენ და როგორც ავტონომიის ასევე ცენტრალური ხელისუფლების მეთაურებისგან კონკრეტული ზომების მიღებას მოითხოვენ. კონკრეტულად, ავტონომიის ხელმძღვანელობისგან საინფორმაციო საშუალებების წარმომადგენელთა დევნა-შევიწროების შეწყვეტას; ჟურნალისტებზე კონკრეტული ზეწოლის ფაქტების გამო სისხლის სამართლის საქმის აღძვრას; დამნაშავე პირთა დაკავებას და კანონის მთელი ძალით დასჯას.
ცენტრალური ხელისუფლების წარმომადგენლებისადმი მიმართვაში ჟურნალისტები კონკრეტული ფაქტების კონტროლზე აყვანის გარდა უკვე ავტონომიის ტერიტორიაზე საგანგებო რეჟიმის გაუქმებას ითხოვენ. მოტივაცია საკმაოდ მარტივია, მას-მედიის წარმომადგენელთა აზრით საგანგებო რეჟიმი ადგილობრივი ხელისუფლების მხრიდან მას-მედიისათვის კონსტიტუციით მინიჭებული უფლების განხორციელებაში ხელის შეშლის გამამართლებელ გარემოებად არის გადაქცეული.
