ბათუმი, გარდა იმისა, რომ გაძლიერებულია ქალაქის ქუჩებში პატრულირება, ბოლო რამდენიმე დღეა, სამხედრო ვერტმფრენებითაც კონტროლდება. ეს, საერთო სტაბილურობისათვის შეიძლება აუცილებელიც იყოს, მაგრამ დღევანდელ ვითარებაში, ადამიანების საერთო ნერვულ სისტემაზე ნეგატიურად რომ აისახება, ფაქტია. სხვა-თაშორის, არსებობს ისეთი ფაქტებიც, რომლებიც მტკიცებას არა, მაგრამ ახსნა-განმარტებას მაინც საჭიროებენ. ასეთ ახსნა-განმარტებას კი დღეს დალაგებულად ვერავინ იძლევა…
როგორც ცნობილია, რუსეთი, თავისი ჯარის საქართველოდან გაყვანისთვის 7-9 წელს ითხოვს, ქართული მხარე კი სამი წელია, რაც სამ წელს იძახის. კიდევ რამდენი სამი წელი გავა არავინ უწყის, მაგრამ ახალ ფუნქციას რომ იძენს ბათუმში დისლოცირებული რუსეთის მე-12 სამხედრო ბაზა, ფაქტია. ვრცელდება ინფორმაცია იმის თაობაზეც, რომ ამიერკავკასიის სამხედრო ოლქი შტაბ-ბინას ბათუმში დაიდებს.
რა აუცილებლობით იყო ეს გამოწვეული? ადგილობრივი ოპოზიცია აბაშიძის რეჟიმის შესაცვლელად ბრძოლის მშვიდობიან მეთოდებზე საუბრობს. პარალელურად იქმნება სხვადასხვა ორგანიზაციები თუ მოძრაობები, რომლებიც საგანგებო მდგომარეობის გაუქმებას და აჭარის პარლამენტის დათხოვნას მოითხოვენ.
მაშინ, როცა აბაშიძის გადადგომასა და ბათუმიდან წასვლაზე საუბრობენ, მეორეს მხრივ აბაშიძე, თავდაცვისთვის, როგორც ამბობენ (სხვათაშორის თავადაც აცხადებს) სერიოზულად ემზადება. თუ რას გულისხმობს ადგილობრივი ოფიციოზი კონსტიტუციური წყობის დაცვაში და რა საამისო ბერკეტები გააჩნია – არ კონკრეტდება. აჭარის მეთაური მხოლოდ მინიშნებებს აკეთებს – არ გამორიცხავს 90-91 წლების განმეორებას და უფრო შორსაც მიდის – მან რეგიონში მეორე აფხაზეთის შესაძლო გაჩენის ალბათობაც დაუშვა. და ეს მაშინ, როდესაც არანაირად არ იკვეთება ის, თუ ვინ ვის უნდა ეომოს. ყოველ შემთხვევაში მოსახლეობაში მყარადაა გაჯერებული აზრი, რომ ადგილობრივი მცხოვრებლები ერთმანეთს არ დაერევიან. თუ ვის ელოდება ჩოლოქს გაღმიდან აჭარის ხელისუფლება, გაუგებარია. აჭარაში ჯარების შესევა, პირველ რიგში ქვეყნის პრეზიდენტისთვისაა, რბილად რომ ვთქვათ, წამგებიანი. მიუხედავად ამისა, მაინც ვრცელდება ხმები იმაზე, რომ არჩევნებამდე აჭარაში სიტუაციის დაძაბვა და რეგიონის შიგნით რაიმე სახის კონფლიქტი, თუ დაპირისპირება სწორედ ცენტრალურ ხელისუფლებას აწყობს, რათა პრე-ზიდენტს ჰქონდეს საბაბი და შეძლოს აჭარაში საპრეზიდენტო მმართველობის შემოღება.
საქართველოს დედაქალაქიდან ბათუმის მისამართით მკაცრი განცხადებების ტონი, მართალია შერბილდა, სერიოზული კონფლიქტის ხელოვნურად შექმნაზეც ისე აღარ საუბრობენ, მაგრამ შესაძლო სისხლისღვრის თემა მაინც აქტუალური რჩება. ზოგიერთები თვლიან, რომ ეს მხოლოდ და მხოლოდ ხალხის დაშინების პოლიტიკაა და მეტი არაფერი. ვინ, რა და რამდენ ქულას იწერს ამით, და ვის სჭირდება აჭარაში მცხოვრებთა „განტევების ვაცად“ ქცევა, ძნელი სათქმელია.
გაჩნდა ვერსია, რომ რეგიონის ხელმძღვანელობა ბათუმში დისლოცირებულ რუსულ ჯარს გამოიყენებს. კონკრეტულად რა შემთხვევაში – ამაზე დაწვრილებით არა-ვინ საუბრობს. რაც შეეხება თავად ასლან აბაშიძეს, მან რუსეთის მხრიდან დახმარებასთან დაკავშირებით, დაახლოებით ასეთი შინაარსის კომენტარი გააკეთა – „იმ საშიშროებასთან დაკავშირებით, რაც ემუქრება ავტონომიურ რესპუბლიკას, დაეხმარება თუ არა რუსეთი, მჭირდება თუ არა მე დახმარება? – ჩვენ არა მარტო გვჭირდება, არა მარტო გვინდა, ჩვენ მოვუხმობთ მსოფლიო საზოგადოებრიობას… საზოგადო მოღვაწეებს, სახელმწიფო მოხელეებს და სხვას, მათ შორის რუსეთსაც.“
კულუალური ინფორმაციით, ბათუმში დისლოცირებულ რუსეთის ბაზაში სერიოზული საკადრო ცვლილებები დაიწყო. როგორც ამბობენ, რუსეთის არმიაში, ეროვნებით ქართველ მოსამსახურეებს უბრძანეს, რომ მათ ხელშეკრულებას ვადა გაუვიდა და ვისაც მისი გაგრძელება სურს – ეს სხვა ნაწილებში მოხერხდება. სხვა ინფორმაციით ეს იყო უშუალო ბრძანება, რითაც ქართველი სამხედროები რუსეთში გადაიყვანეს და ამ დროისთვის გაურკვეველ ვითარებაში, ქ. როსტოვში არიან დისლოცირ-ებულნი. (მათ საკუთარ ოჯახებში დასატოვებლად წინასწარ, თითქოსდა თანხებიც, დაახლოებით 200 ლარამდე დაურიგდათ). რუსეთის ჯარში მომსახურე ქართველი სამხედროების გაყვანა ბათუმის ბაზიდან გრძელდება.
ეს ნაწილი აქამდე 80%-ით (შესაბამისი ხელშეკრულების საფუძველზე) ქართველებით იყო დაკომპლექტებული. მას ასლან აბაშიძე ერთგვარ შინაურ ფორმირებადაც კი განიხილავდა. „ეს არის პრესტიჟული სამხედრო სამსახური, სადაც ხელფასები მაღალია, იმასთან შედარებით, რასაც ჩვენთან იძლევიან. ერთმნიშვნელოვნად იმის თქმა, რომ ეს უცხოური ჯარია, უბრალოდ აბსურდია“ – აცხადებს რეგიონის ხელისუფალი.
მე-12 სამხედრო ბაზა მართლა „შინაურებისგან“ რომ შედგებოდა, ყველამ იცის, მაგრამ იქ დასაქმებული დაახლოებით 2 ათასამდე ქართველი რიგითი, თუ ოფ-იცერი რუსეთის ქალაქებში ამ დღეებში გაიყვანეს ან გაჰყავთ. გავრცელებული ინფორმაციით მათ რუსეთის ტერიტორიაზე განლაგებული სხვადასხვა ნაწილებიდან ძირითადად არარუსი ეროვნების ჯარისკაცები ჩაენაცვლა.
რაში დასჭირდა რუსეთს დაქირავებული ქართველების ბათუმიდან მოშორება. ამ კითხვაზე კონკრეტული პასუხის გამცემი არავინაა, მაგრამ არაოფიციალური ვერსიები არსებობს. ის, რასაც ყველა ერთხმად აცხადებს შემდეგია – ქართველი, ვისი მხარდამჭერიც არ უნდა იყოს, ქართველს არ ესვროდა და თურმე ამიტომ მოხდა მათი ჩანაცვლება.
რა გასროლაზეა საუბარი – ცენტრალური ხელისუფლების მხრიდან მოსალოდნელ თავდასხმაზე, რასაც ადგილობრივი ხელისუფლება რუსის ჯარს დაუპირისპირებს, თუ არანაკლებ უარესის – ადგილობრივ უკმაყოფილო ჯგუფებს დაუპირისპირებენ რუსულ ჯარს?
პირველ შემთხვევაში „რუსული ჩექმა“ წესით ვერ უნდა ამოქმედდეს, იმდენად, რამდენადაც არც ერთ საერთაშორისო ორგანიზაციის რეკომენდაციაში არ წერია ძალის გამოყენებაზე. როგორც ცნობილია, პრეზიდენტი სააკაშვილი ამ რეკომენდაციების ბრწყინვალე შემსრულებელია, აქედან გამომდინარე აგრესია ცენტრალური ხელ-ისუფლებისგან გამორიცხული უნდა იყოს.
მაგრამ არსებობს სხვა ვერსიაც: თუ სააკაშვილი მაინც გადაწყვეტს საპრეზიდენტო მმართველობის აჭარაში შემოღებას, მან სამხედრო შენაერთები უნდა გადმოსხას. წესით, ასეთ შენაერთებს მათ დაახვედრებენ.
ეს რაც შეეხება ვერსიებს. ჭკუასთან უფრო ახლოს კი, ის გეგმა უნდა იყოს, რომელშიც რუსეთის ჯარით იმ ხალხის დაშინება შედის, ვინც აჭარის ხელისუფლების შეცვლას ითხოვს. მაგრამ ასლან აბაშიძისთვის მათ შესაშინებლად თუ დასარბევად ის ძალებიც საკმარისი იქნება, რომელიც უშუალოდ მის დაქვემდებარებაშია. მაშ რაში სჭირდება აბაშიძეს რუსული არმიის მოშველიება? პასუხი მარტივია – იმის დასამტკიცებლად, რომ ის მარტო არ არის.
ამის თქმის უფლება აჭარის ხელისუფალს რომ არ ჰქონოდა, არც იტყოდა, თუმცა სააკაშვილი აქტიურად ემზადება პუტინთან შესახვედრად, მანამდე კი მოსკოვს კოლინ პაუელი სტუმრობდა. თუმცა საქართველოს უსაფრთხოებაზე თავს არც ერთი გარე ძალა რომ არ გაიგიჟებს, ამის არ დანახვაც სიბრიყვეა…
აქვე ვრცელდება ინფორმაცია იმის თაობაზეც, რომ ბათუმში 500-დან 1000 ჯარისკაცამდე დამატებითი კონტიგენტიც ჩამ-ოიყვანეს. კავკასიაში პირველად მოხვედრილი ჯარისკაცები საწვრთნელ ვარჯიშებს უკვე გადიან. ამ დღეებში გონიოს პოლიგონზე განსაკუთრებით მობილიზებული წვრთნა წარმოებდა.
