კონკურსი დამწყები რეჟისორებისათვის

მულტიმედია განათლების ცენტრი და საქდოკ ფილმი, ამერიკის საელჩოს დაფინანსებით, იწყებს პროექტს „16 ქალი ცვლილებებისთვის“. პროექტის მიხედვით, 16 დოკუმენტურ ფილმს გადაიღებენ ქალის შესახებ ქართულ საზოგადოებაში. პროექტისთვის შეირჩევა 16 ქალი 17-დან 25 წლამდე. აუცილებელია მათ ჰქონდეთ კამერასთან მუშაობისა და მონტაჟის საბაზისო გამოცდილება და აინტერესებდეთ, შექმნან ძლიერი ქალების პორტრეტები.

პროექტის შესახებ

ფილმების წარმოება დაიწყება 2018 წლის მაისში და დასრულდება დეკემბერში. ამ დროის განმავლობაში მულტიმედია განათლების ცენტრი და საქდოკ ფილმი დაეხმარებიან მონაწილეებს, გადაიღონ 10 წუთამდე ხანგრძლივობის დოკუმენტური ფილმები და უზრუნველყოფენ აუცილებელ ტექნიკურ საშუალებებს. გარდა ამისა, პროექტი მოიცავს საგანმანათლებლო ვორქშოფების სერიას, სადაც მონაწილეები აითვისებენ მოკლემეტრაჟიანი ფილმის გადაღებისა და მონტაჟის უნარებს, ასევე მიიღებენ ცოდნას მისი მომზადებისა და დისტრიბუციის შესახებ.

თითოეული ფილმის წარმოებისთვის მონაწილეები მიიღებენ თანხას 600 დოლარამდე. პროექტის დასრულების შემდეგ მოეწყობა სპეციალური საჯარო ჩვენება და საუკეთესო ფილმები დაჯილდოვდება პრიზებით.

ტრენერები

ვორქშოპს გაუძღვება ორი ქართველი ტრენერი:

სალომე ჯაში, დოკუმენტური კინოს რეჟისორი. მისი ფილმები ნაჩვენები ყოფილა როგორც მრავალ საერთაშორისო კინოფესტივალზე, ასევე ტელეარხების საშუალებით მსოფლიოს სხვადასხვა ქვეყანაში, მათ შორის arte-ზე. არის მიწვეული ტრენერია სხვადასხვა საერთაშორისო ვორქშოფზე.

თამარ მშვენიერაძემ დაამთავრა GIPA-ს ჟურნალისტიკისა და მედიამენეჯმენტის ფაკულტეტი. არის გადაცემა „რეალური სივრცის“ რეპორტიორი და პროდიუსერი. არის რამდენიმე ტრანსმედია პროექტის ავტორი. თანამშრომლობს საქდოკ ფილმთან დოკუმენტური ფილმის წარმოებაში.

ქართველ ტრენერებთან ერთად ვორქშოფების სერიას შემოუერთდება ორი ამერიკელი სპეციალისტი – Lina Srivastava, დოკუმენტალისტი და Kayan Ghavim, BuzzFeed-ის მოკლე ვიდეოების ტრენდის ერთ-ერთი შემქმნელი.

*ინფორმაცია მონაწილეებისთვის რეგიონიდან

რეგიონებიდან მონაწილეების თბილისში მგზავრობისა და ცხოვრების ხარჯებს დაფარავს პროექტის ორგანიზატორი.