ხულოს გამგებლის, ბესიკ ბაუჩაძის მძღოლმა – მერაბ ცეცხლაძემ 2014 წელს მივლინებაში 167 დღე გაატარა, 2015 წელს კი – 143 დღე. თავად ბესიკ ბაუჩაძეს 2015 წელს, ოფიციალურად, სულ ხუთი სამივლინებო დღე ჰქონია. გამგებელი იმის გამო, რომ მისი ოჯახი ბათუმში ცხოვრობს, ხშირად სამსახურში არ იმყოფება – ეს პრეტენზია ბესიკ ბაუჩაძის მიმართ იმ ადამიანებს აქვთ ხულოდან, რომლებიც ამბობენ, რომ გამგებელთან შეხვედრა ვერ მოახერხეს. გამგებელი ამ მოსაზრებას კატეგორიულად არ ეთანხმება.
ხულოს გამგებლის ბესიკ ბაუჩაძის მძღოლი მერაბ ცეცხლაძე 2014 წელს ნახევარ წელზე მეტ ხანს იმყოფებოდა მივლინებაში – სულ 167 სამუშაო დღე. მისთვის გამოყოფილი სამივლინებო თანხა კი, მთლიანობაში, 2 595 ლარია. მძღოლთან შედარებით ნაკლები სამივლინებო დღეა გაწერილი თავად გამგებელზე, რომელსაც ეს მძღოლი ემსახურება: 2014 წელს ბესიკ ბაუჩაძე მივლინებაში სულ 16 დღის განმავლობაში ყოფილა.
ცოტა ნაკლები – 143 დღე გაუტარებია მერაბ ცეცხლაძეს მივლინებაში 2015 წელს, მაშინ, როცა გამგებელი თითქმის არ ყოფილა მივლინებაში. მერაბ ცეცხლაძის მივლინებასთან დაკავშირებით ყველაზე მეტი ბრძანება გამგებელს 2015 წელს, ნოემბერში დაუწერია – მთლიანობაში 6 ბრძანება და 14 სამუშაო დღე.
რა დავალებას ასრულებდა გამგებლის მძღოლი მერაბ ცეცხლაძე იმ პერიოდში, როცა მივლინებაში იმყოფებოდა, მაგალითად, 2014 წლის განმავლობაში? – „ბათუმელებმა“ მერაბ ცეცხლაძეს ერთი კონკრეტული ფაქტის გახსენება სთხოვა. მან ამ საკითხზე საუბარი არ ისურვა, – თქვა, რომ ვერც ერთ კითხვაზე ვერ გვიპასუხებს.
ბესიკ ბაუჩაძე
კონკრეტული მოქალაქეების პრეტენზიას, რომ გამგებელთან შეხვედრა ხშირად შეუძლებელია, ბესიკ ბაუჩაძე არ იზიარებს. ამბობს, რომ გამგეობაში მხოლოდ მაშინ არ იმყოფება, თუ მოსახლეობას ხვდება, ან სამუშაო ვიზიტით მუნიციპალიტეტის ფარგლებს გარეთაა: „მე მაქვს მოქალაქეთა მიღების დღეები. გარდა ამისა, მოქალაქეებთან შეხვედრებს ვმართავ სოფლებში. გამგებელი ყველა დღეს ვერ იქნება მუნიციპალიტეტში, რადგან მას სხვა საქმეებიც აქვს. მოადგილეები არიან, რომლებიც მიხედავენ მოქალაქეებთან მიღებას. თუ სტატისტიკას გადავხედავთ, 2015 წელს დაახლოებით 10 000 მოქალაქე მყავს მიღებული. ამდენად, ეს განცხადება უსაფუძვლოა და ოპონენტების მიერ დაგეგმილი პროვოკაციაა“.
ბესიკ ბაუჩაძის თქმით, მოვალეობის შესრულებაში ხელი რომ არ შეშლოდა, გარკვეული ცვლილებები შეიტანა თავის საუნივერსიტეტო განრიგშიც: „რუსთაველის უნივერსიტეტში სრული შტატი მქონდა და გადავედი ნახევარ შტატზე, აკადემიური შვებულება ავიღე – ახალი სასწავლო წლის პირველ სემესტრში არ მქონდა ლექციები, მეორე სემესტრში პარასკევს, სამი საათის შემდეგ მაქვს ლექცია და შაბათს. ეს ჩემი უფლებაა და ამით მუნიციპალიტეტი არ ზარალდება“.
გამგებელი თავისი მძღოლის მივლინებაში ხშირად ყოფნას იმით ხსნის, რომ მუნიციპალიტეტის ბალანსზე არსებული ავტომობილები მოძველებული ყოფილა. აქვე იმასაც აღნიშნავს, რომ ის, როგორც გამგებელი, არაერთი სამთავრობო კომისიის წევრია და ხშირად უწევს ამ ფორმატის შეხვედრებზე გამგზავრება. გარდა ამისა, გამგებელი მძღოლის მივლინებაში გასვლის მიზეზად სოფლებში მოსახლეობასთან ხშირ შეხვედრას ასახელებს და დასძენს, რომ ყველა მივლინება კანონის შესაბამისად აქვს გაწერილი, თვითონ კი სამივლინებო თანხას არ იღებს:
„საზღვარგარეთ ან თბილისში თუ არ მივდივარ, მივლინების თანხით არ ვსარგებლობ, მაგრამ ეს არ ნიშნავს, რომ ჩემი მძღოლიც არ სარგებლობს მივლინების თანხით. ის ასრულებს მოვალეობას და უნდა ისარგებლოს კიდეც“.
ბესიკ ბაუჩაძე ამბობს, რომ შეუძლებელია ზუსტად ახსოვდეს, რისთვის ისარგებლა მისმა მძღოლმა მივლინებით, მაგალითად, 2015 წელს: „შეიძლება მანქანის რემონტზე მიდის, აქ ადგილზე არ არის ტექმომსახურება, ხელშეკრულება ჩაქვში გვქონდა გაფორმებული. ასევე, ხშირად გვაქვს სოფლებში მოსახლეობასთან შეხვედრა – იმ შემთხვევაში თუ გზა 40 კილომეტრს აჭარბებს, მივლინება იწერება“.
ბესიკ ბაუჩაძე ამბობს, რომ მძღოლი შეიძლება გამგებლის გარეშეც წავიდეს მივლინებაში. „ხშირად უწევს ჩემს მძღოლს ჩემ გარეშე სხვადასხვა დავალებაზე წასვლა“, – ამბობს ის.
