მთავარი,სიახლეები

პატიმრების წამება – სასამართლო საქმეს მესამე წელია განიხილავს

30.03.2016 • 2325
პატიმრების წამება – სასამართლო საქმეს მესამე წელია განიხილავს

„ერთხელ ციხეში პატიმარი მოიყვანეს, ვეკუა იყო გვარად და ნარკოტიკების გადმოტანისთვის უნდა მოეხადა სასჯელი. მისი გვარი ციხის უფროსმა, გიორგი ვეკუამ რომ ამოიკითხა, რეჟიმის უფროსს უთხრა, გაუსწორდი, როგორც საჭიროა, გვარს მირცხვენსო“, – ეს ისტორია მოსამართლე დავით მამისეიშვილს ზაურ მოფინაძემ მოუყვა, ბათუმის მე-3 სასჯელაღსრულების დაწესებულების უსაფრთხოების სამსახურის ყოფილმა უფროსმა.

ბათუმის საქალაქო სასამართლოში მესამე წელია გრძელდება ბათუმის ციხის პატიმრების წამების საქმის განხილვა. ბრალდებულები არიან გირაოთი გათავისუფლებული ციხის ყოფილი უფროსი გიორგი ვეკუა და მისი მოადგილე (რეჟიმის უფროსი) ზაზა ჯიქია. მათ პატიმრების წამებასა და არაადამინურ მოპყრობაში ედებათ ბრალი.  პროკურატურამ ამ საქმეზე 116 პირის მოწმის სახით დაკითხვა მოითხოვა. მათ შორის არიან ყოფილი პატიმრები და ციხის ადმინისტრაციის თანამშრომლები. თუკი გავითვალისწინებთ იმას, რომ ჯერჯერობით 40-მდე მოწმეა დაკითხული, საქმე ვერც წელს დასრულდება.

პატიმრების წამების საქმეს მოსამართლე დავით მამისეიშვილი 2014 წლის 4 მარტიდან განიხილავს.

ციხის ადმინისტრაციის ყოფილი თანამშრომელი მთელი საათის განმავლობაში უყვებოდა სასამართლოს წამების სხვა შემთხვევების შესახებაც: „გიორგი ვეკუა 2009 წლიდან დაინიშნა ციხის უფროსად. პაემანი ერთი საათიდან 15 წუთამდე შეზღუდა, სატელეფონო საუბრები კი პატიმრებისთვის საერთოდ აიკრძალა“; „გიორგი ვეკუა და ზაზა ჯიქია უშუალოდ უსწორდებოდნენ ფიზიკურად პატიმრებს“; „სამედიცინო მომსახურებაზე ნათქვამი იყო, რომ პატიმრებს ხშირად არ უნდა მოეთხოვათ. ვინც ამას არ ემორჩილებოდა, ისეთს უზამდნენ, მერე საერთოდ აღარ ითხოვდა“; „ერთი ვინმე თუ დააშავებდა რამეს, მაგალითად, თუ ხმამაღლა რაღაცას წამოიძახებდა, მთელ საკანს უსწორდებოდნენ, სცემდნენ“.

„მეტსახელები ჰქონდათ ციხის უფროსებს?“ – ეს კითხვა მოწმეს პროკურორმა ვლადიმერ თურმანიძემ დაუსვა?

„კი, ნინძას და ჯეკი ჩანს ეძახდნენ ზაზა ჯიქიას პატიმრები. ალბათ, იმიტომ, რომ ძალიან სწრაფი იყო“, – აღნიშნა ზაზა მოფინაძემ.

პროკურორს მოწმემ ასევე უპასუხა კითხვაზე, იდგა თუ არა საჩივრების ყუთი ციხის დერეფანში. „იყო, მაგრამ ჯერ არ დამინახავს კაცი, მაგაში წერილი ჩაეგდოს“. ზაზა მოფინაძე სასამართლოს მოუყვა იმასაც, რომ თვითონ მხოლოდ ერთ პატიმარს სცემა გინების გამო.

ზაზა მოფინაძის თქმით, პატიმრებზე სასტიკი მოპყრობა მაშინვე შემცირდა, როგორც კი ციხის ადმინისტრაცია შეიცვალა. თუმცა, 2012 წლის საპარლამენტო არჩევნების შემდეგ, მან სამუშაო საკუთარი განცხადების საფუძველზე დატოვა.

2012 წლის არჩევნების შემდეგ პატიმრებმა კოლექტიური განცხადებით მიმართეს პროკურატურას. მიმართვიდან თითქმის ოთხი წლის შემდეგ უკვე ყოფილი თუ ამჟამინდელი პატიმრები სასამართლოს გადაწყვეტილებას ელიან.

გადაბეჭდვის წესი


ასევე: