„პაციენტი თავს კარგად გრძნობს, დონორი დღეს გავწერეთ სახლში“- აცხადებს ქირურგი კახა ქაშიბაძე, რომელიც ღვიძლის გადანერგვის ოპერაციას უძღვებოდა უცხოელ კოლეგებთან ერთად.
ექიმის განცხადებით, ღვიძლის წარმატებით გადანერგვის შემდეგ პაციენტთა მიმართვიანობა გაიზარდა. „ბევრია პაციენტი, საქართველოს ყველა რეგიონიდან მოგვმართავენ. შემდეგი ორი ოპერაცია, სავარაუდოდ, თებერვლის დასაწყისში ჩატარდება“.
ღვიძლის გადანერგვის ოპერაცია 80 ათასი ლარი დაჯდა. აქედან 30 ათასი ლარი, პაციენტმა უნდა დაფაროს, დანარჩენს კი კლინიკა იხდის.
აჭარის ჯანდაცვის სამინისტროს პრესსამსახურის ინფორმაციით, 30 ათასი ლარიდან, 15 ათასს ლარს, პაციენტს აჭარის მთავრობა დაუფარავს: „აღნიშნული თანხა აჭარის მთავრობის სარეზერვო ფონდიდან გამოიყოფა. პაციენტს მხოლოდ 15 ათასი ლარის გადახდა მოუწევს“-აცხადებენ პრესსამსახურში.
ღვიძლის გადანერგვის ოპერაცია ბათუმში პირველად 14 დეკემბერს ბათუმის რეფერალურ საავადმყოფოში ქართველი ექიმების მიერ ჩატარდა. ოპერაციას ინდოეთის წამყვანი ქირურგი, ტრანსპლანტოლოგი ხელმძღვანელობდა. ოპერაციისთვის მზადება სამედიცინო კორპორაცია „ევექსმა“ ერთი წლის წინ დაიწყო.
ღვიძლის გადანერგვის ოპერაცია 20 საათის განმავლობაში გრძელდებოდა. დონორი ძმა იყო, რომელმაც საკუთარი ღვიძლის ნაწილი 32 წლის ციროზით დაავადებულ დას მისცა. ოპერაციის ღირებულება დაახლოებით 80 ათასი ლარია. როგორც „ევექსში“ აცხადებენ, პირველი ოპერაციის თანხის ნაწილი კომპანია „ევექსმა“ დაფარა და ამჯერად სახელწიფოსთან მოლაპარაკება მიმდინარეობს, რომ შემუშავდეს პროგრამა, რომელიც ღვიძლის გადანერგვის საჭიროების მქონე პაციენტებს ფინანასურად დაეხმარება.
