2013 წლის ციტრუსის სეზონის მოსავლის აღების ღონისძიებათა ხელშეწყობის მიზნით, საქართველოს მთვრობის 2013 წლის 26 დეკემბრის #2174 განკარგულებით, მთავრობის სარეზერვო ფონდიდან აჭარის ავტონომიურ რესპუბლიკას გამოეყო 12 000 000 ლარი, საექსპორტოდ ჩაბარებული ციტრუსისათვის სუბსიდიის სახით 1კგ.-ზე 0.15 ლარის ანაზღაურების გასაცემად. აღნიშნული სუბსიდიის მისაღებად აუცილებელ გარემოებას წარმოადგენდა შესყიდვის აქტის შედგენა, რომელიც ხელმოწერილი უნდა ყოფილიყო ციტრუსის ჩამბარებელი ფიზიკური პირის, ციტრუსის შემსყიდველი პირისა და თვითმმართველი ერთეულის წარმომადგენლის მიერ.
გამოძიებით დადგინდა, რომ 2013 წლის 25 დეკემბერს ვალერიან პოღოსოვმა, ქობულეთის მუნიციპალიტეტის ხალას თემში მცხოვრებ ლევან ფალავანდიშვილისაგან შეიძინა 2 780 კგ. მანდარინი.
მანდარინის შესყიდვისას, შესყიდვის აქტში ქობულეთის მუნიციპალიტეტის ხალას თემის რწმუნებულის მალხაზ დიასამიძისა და ლევან ფალავანდიშვილის მიერ სახელმწიფოსაგან გამოყოფილი სუბსიდიის თაღლითურად დაუფლების მიზნით, მოხდა ყალბი მონაცემების შეტანა, ერძოდ: შესყიდვის აქტში ხელოვნურად იქნა გაზრდილი ვალერიან პოღოსოვზე რეალიზებული მანდარინის რაოდენობა, 2 780 კილოგრამი მანდარინის რეალიზაციის ნაცვლად მითითებული იქნა 7 000 კილოგრამი მანდარინის რეალიზაცია.
შესყიდვის აქტი დამოწმებულ იქნა ხალას თვითმმართველი ერთეულის ბეჭდითა და რწმუნებულის მალხაზ დიასამიძის ხელმოწერით.
მიმდინარეობს გამოძიება საქართველოს სისხლის სამართლის კოდექსის 180-ე მუხლის მე-2 ნაწილის „ბ“ ქვეპუნქტითა და 341-ე მუხლით, რაც ითვალისწინებს თავისუფლების აღკვეთას ოთხიდან შვიდ წლამდე ვადით.
