ბათუმის მერიამ საკრებულოში შეიტანა განკარგულების პროექტი, რომლითაც ქალაქის მერს უნდა მიეცეს თანხმობა მოახდინოს ორი არასამეწარმეო [არაკომერციული] იურიდიული პირის: „საჭადრაკო კლუბი ნონა“-ს და „ბათუმის საცხენოსნო კლუბი“-ს ლიკვიდაცია.
„მართვის ოპტიმიზაციის მიზნით, მიზანშეწონილია აღნიშნული კერძო სამართლის იურიდიული პირების უფლება-მოვალეობანი გადაეცეს ა[ა]იპ „ბათუმის სპორტულ ცენტრს“.
ამასთანავე, იმის გათვალისწინებით, რომ ლიკვიდაციის პროცესის დაწყება, დაკავშირებულია ორგანიზაციულ-სამართლებრივი ღონისძიებების განხორციელებასთან, კერძოდ, მიმდინარე სახელმწიფო შესყიდვების ხელშეკრულებების შესრულებასთან, ფინანსური ვალდებულებების დაანგარიშებასთან და ა.შ. მიზანშეწონილია ლიკვიდაციის პროცესის დაწყებისათვის ოპტიმალური პერიოდის შერჩევა, რის თაობაზეც შესაბამისი გადაწყვეტილება მიღებული იქნება ქალაქ ბათუმის მუნიციპალიტეტის აღმასრულებელი ორგანოს მიერ“. – წერია განკარგულების პროექტში.
პროექტს ბათუმის საკრებულო 2026 წლის 21 აგვისტოს სხდომაზე განიხილავს.
განმარტებით ბარათში წერია, რომ განკარგულების პროექტის ინიციატორია ქალაქ ბათუმის მუნიციპალიტეტის მერი. ამასთან, „განკარგულების პროექტის მომზადების პროცესში კონსულტაციები არ მიღებულა“.
ბათუმის მერია აცხადებს, რომ ლიკვიდაციის პროცესის შედეგად „შემცირდება ბიუჯეტის ხარჯვითი ნაწილი და ამასთან საბიუჯეტო ასიგნების ფარგლებში
თავისუფლდება ფინანსური სახსრები“.
ერთის მხრივ მერია ორი ა[ა]იპ-ის გაუქმებით ბიუჯეტის ხარჯების შემცირებაზე საუბრობს, თუმცა საკრებულოში შეტანილი აქვს სხვა დადგენილების პროექტიც, რომლითაც ახალი სამსახურის [სსიპ-ის] შექმნას ითხოვს – მომავალი თანამშრომლებისთვის მაღალი ხელფასებით.
რამდენით გაიზრდება ქალაქის ბიუჯეტის ხარჯები ახალი სსიპ-ის შექმნით, მერია არ აკონკრეტებს და განმარტებით ბარათში წერს, რომ „დადგენილების მიღება გამოიწვევს ცვლილებას ბიუჯეტში, იმ მოცულობით, რა მოცულობითაც იქნება დამტკიცებული სამსახურის ბიუჯეტი.“
ამ თემაზე:
