„თუ ასეთი გამყიდველების ხარჯზე აპირებს ივანიშვილი საქართველოს აშენებას, მე ვიქნები მისთვის პირველი მახვილი“ – აცხადებს „ბათუმელებთან“ ლეიბორისტური პარტიის აჭარის ორგანიზაციის თავჯდომარე დავით რობაქიძე.
პარტიის რეგიონული ორგანიზაციის თავჯდომარისთვის უკვე ყოფილი თანაპარტიელების გადაწყვეტილება, როგორც თავად ამბობს, „შოკისმომგვრელი“ იყო.
„შეხვედრებზე ვიყავი შუახევის რაიონში, ეს არის ღალატი და ზურგში ჩამარტყეს მახვილი, უკვე უბნის კომისიებში წევრების ჩანაცვლებისა და მაჟორიტარების წარდგენის ვადაც მოწურულია, არ მინდა დავწვრილმანდე და ვთქვა, რისთვის გააკეთეს, თუ წინააღმდეგობა ჰქონდათ პარტიის კურსთან, ეთქვათ აქამდე. მოღალატეები არც პარტიას და არც ქვეყანას გამოადგებიან“ – ამბობს დავით რობაქიძე.
იგი ამბობს, რომ უკვე ესაუბრა პარტიის ლიდერს, შალვა ნათელაშვილს, „ჩემს ხმაზე მიხვდა, როგორ დღეშიც ვარ და მითხრა, მშვიდობიანდ ჩადი და ბათუმში რომ ჩამოვალ, ისევ დავუკავშირდები და გავაგრძელებთ საუბარს“.
რობაქიძე ამბობს, რომ განსაკუთრებით მოულოდნელი ბიძინა დუმბაძის გადაწყვეტილება იყო: „2008 წელსაც მოხსნა ბიძინა დუმბაძემ მურმან დუმბაძის სარგებლოდ კანდიდატურა და რამდენი ძალისხმევა დამჭირდა რომ პარტიიდან არ გაერიცხათ. ასე დამიფასა“ – ამბობს რობაქიძე.
თამაზ დევაძე ლეიბორისტური პარტიის წევრი იყო 2003 წლიდან, ბიძინა დუმბაძე კი 13 წლის განმავლობაში იყო ლეიბორისტურ პარტიაში. მათ დღეს „ქართული ოცნების“ ბათუმის ოფისში განაცხადეს, რომ ლეობორისტური პარტიის კურსი მათთვის მიუღებელი იყო.
