უკრაინას არ შეუძლია უსაფრთხოების გარანტია მისცეს ქვეყნებს, რომელთა წარმომადგენლებიც 9 მაისს მოსკოვში აღლუმზე გეგმავენ ყოფნას, რადგან რუსულ მხარეს შეუძლია ნებისმიერი ქმედება განახორციელოს სტუმრების წინააღმდეგ და უკრაინული მხარე არ არის პასუხისმგებელი რუსეთის ფედერაციაში მიმდინარე მოვლენებზე – განაცხადა უკრაინის პრეზიდენტმა, ვოლოდიმირ ზელენსკიმ.
„ჩვენი პოზიცია ძალიან მარტივია ყველა იმ ქვეყნის მიმართ, ვინც 9 მაისს მიდის ან აპირებს წასვლას: ჩვენ არ შეგვიძლია ვიყოთ პასუხისმგებელი იმაზე, რაც ხდება რუსეთის ფედერაციის ტერიტორიაზე. ისინი უზრუნველყოფენ თქვენს უსაფრთხოებას და შესაბამისად, ჩვენ ვერ მოგცემთ ვერანაირ გარანტიას, რადგან არ ვიცით, რას იზამს რუსეთი ამ ხანებში“ – თქვა ზელენსკიმ.
უკრაინის პრეზიდენტის თქმით, რუსეთმა შეიძლება რაღაც მოიმოქმედოს და ამაში უკრაინა დაადანაშაულოს.
„ამის შესახებ საგარეო საქმეთა მინისტრსაც ვუთხარი, რომ ჩვენთან დაკავშირებულ ადამიანებს უნდა ვუთხრათ: „ჩვენ არ გირჩევთ რუსეთის ფედერაციაში ვიზიტს, უსაფრთხოების თვალსაზრისით. და თუ ამას გააკეთებთ, ნუ გვკითხავთ. ეს თქვენი პირადი გადაწყვეტილებაა…
… უკრაინას ნამდვილად არ ეკისრება პასუხისმგებლობა იმაზე, რაც დღეს რუსეთში ხდება. ეს ფაქტია“ – განაცხადა ზელენსკიმ.
