ბათუმში, ლერმონტოვის ქუჩაზე, წუხელ, დაახლოებით ღამის 3 საათზე სროლის ხმა იყო. შემთხვევის ადგილზე პოლიციის ათამდე ეკიპაჟი იყო მობილიზებული.
„ბათუმელების“ ინფორმაციით, ლერმონტოვის ქუჩაზე მდებარე მაღაზია „უნივერსამში“ შეიარაღებული პირი შეიჭრა და ფულს ითხოვდა, თუმცა მაღაზიიდან მოახერხეს დაცვის პოლიციასთან დაკავშირება.
პოლიციის ადგილზე მისვლის შემდეგ შეიარაღებული პირი გამოვიდა მაღაზიიდან, ისე, რომ არაფერი წაუღია. მან პოლიციელების მისამართით გაისროლა, თუმცა ის დააკავეს.
ჩვენივე ინფორმაციით, შემთხვევის შედეგად არავინ დაშავებულა.
„ბათუმელები“ დეტალებს აზუსტებს.
განახლება: მოგვიანებით ინფორმაცია გაავრცელა შინაგან საქმეთა სამინისტრომ. „გამოძიებით დადგინდა, რომ ბრალდებული ბათუმში ერთ-ერთ სუპერმარკეტს ყაჩაღურად თავს დაესხა და თანამშრომელს იარაღის მუქარით 2000 ლარი გასტაცა… ყაჩაღობის ბრალდებით 1972 წელს დაბადებული, წარსულში ნასამართლევი ე.მ. დააკავეს.“ – აცხადებს შსს.
ვრცლად :
https://batumelebi.netgazeti.ge/news/495174/?fbclid=IwAR32M1nYQLuRzLJYwqBX0HC6G-_tBDxEW2QBsyfgjy2WQP3WFcDcMA0rkVA
