ომის კვლევის ამერიკული ინსტიტუტი [ISW] ყოველდღიურ ცნობებში რუსეთ-უკრაინის ომის მიმდინარეობის შესახებ დღეს, პირველ სექტემბერს წერს, რომ უკრაინული ძალები აგრძელებენ წინსვლას ფრონტის ორ სექტორში.
ISW-ი მიუთითებს უკრაინის გენერალური შტაბისა და უკრაინის თავდაცვის მინისტრის მოადგილის, ანა მალიარის განცხადებაზე იმის შესახებ, რომ უკრაინის ძალებმა განაგრძეს შეტევითი ოპერაციები ბახმუტისა და მელიტოპოლის (დასავლეთ ზაპოროჟიის ოლქი) მიმართულებით და მიაღწიეს დაუზუსტებელ წარმატებას ნოვოდანილივკა-ნოვოპროკოპივკას მიმართულებით, დასავლეთში.
ISW-ი ასევე წერს, რომ უკრაინის გენერალური შტაბის სარაკეტო ძალების, საარტილერიო და უპილოტო სისტემების მთავარი დირექტორატის უფროსმა, გენერალმა სერხი ბარანოვმა განაცხადა, რომ უკრაინულმა ძალებმა მიაღწიეს რუსეთის ძალებთან კონტრბატარეის შესაძლებლობებში თანასწორობას.
„ბარანოვმა განაცხადა, რომ ნატოს მიერ მოწოდებული საარტილერიო სისტემები 30 კმ-დან 40 კმ-მდე დისტანციით, უკრაინულ ძალებს საშუალებას აძლევს, გაანადგურონ რუსული საარტილერიო სისტემები და აიძულონ რუსული ძალები, გადაიტანონ თავიანთი არტილერია ფრონტის ხაზიდან“ – წერს ISW-ი.
ანალიტიკოსები ანგარიშში წერენ, რომ რუსეთის ხელისუფლებამ რუსული არმიის დისკრედიტაციის ბრალდებით დააკავა ცნობილი ულტრანაციონალისტი რუსი ბლოგერი, სავარაუდოდ, იმისათვის, რომ დაადუმოს ზოგიერთი კრიტიკული ბლოგერი.
აქვე ვკითხულობთ, რომ რუსეთის სამხედრო ხელისუფლებამ, სავარაუდოდ, გასცა ბრძანება სამი რუსი ბლოგერის დაკავების შესახებაც, რომლებმაც გააკრიტიკეს რუსეთის თავდაცვის სამინისტრო.
ISW-ი წერს, რომ რუსულმა ძალებმა განაგრძეს შეტევითი ოპერაციები კუპიანსკ-სვატოვე-კრემინას ხაზის გასწვრივ, ბახმუტთან, ავდიივკა-დონეცკის ქალაქის ხაზის გასწვრივ და წარუმატებლად განხორციელდა კონტრშეტევა დონეცკ-ზაპორიჟიას ოლქის სასაზღვრო ზონაში და დასავლეთ ზაპოროჟიის ოლქში 31 აგვისტოს.
ანგარიშში ასევე აღნიშნულია, რომ რუსეთის საოკუპაციო ხელისუფლება აგრძელებს უკრაინელი ბავშვების რუსეთში დეპორტაციას.
