ომის შემსწავლელი ამერიკული ინსტიტუტის ISW-ის ცნობით, კრემლის მაღალი რანგის ოფიციალური პირები განაგრძობენ შეხვედრებს ბელარუსის მთავრობასთან, რაც შეიძლება მიუთითებდეს უკრაინაზე რუსეთის შეტევის განზრახვაზე ბელარუსიდან, თუმცა არა უახლოეს კვირებში.
ISW-ის ანალიტიკოსები მიიჩნევენ, რომ 2023 წლის დასაწყისში რუსეთის მიერ უკრაინაზე ბელორუსის ტერიტორიიდან ახალი თავდასხმის სცენარის განხორციელება ნაკლებად სავარაუდოა, თუმცა ეს შესაძლებელია მოხდეს 2023 წლის ბოლოს.
ამავე დროს, რუსი ნაციონალისტი სამხედრო ბლოგერები აკრიტიკებენ რუსული ჯარების უკრაინაზე ბელარუსიდან თავდასხმის იდეას.
ISW-ის 19 იანვრის ანგარიშში აღნიშნულია, რომ რუსეთის პრეზიდენტი ვლადიმერ პუტინი სულ უფრო მეტად უჭერს მხარს „ვაგნერის“ ფინანსისტის, ევგენი პრიგოჟინის მტრებს, სავარაუდოდ, პრიგოჟინის გავლენის შესამცირებლად.
ასევე, ანალიტიკოსები წერენ, რომ რუსეთის გენერალური შტაბის უფროსმა, გენერალმა ვალერი გერასიმოვმა, შესაძლოა, განაცხადა, რომ „ვაგნერი“ არ არის რუსეთის შეიარაღებული ძალების სტრუქტურის ნაწილი და რომ რუსი სამხედროები არ თანამშრომლობენ „ვაგნერის“ ჯგუფთან, მიუხედავად მრავალი მტკიცებულებისა, რომ პირიქით ხდება.
ბოლო 24 საათის ანგარიშში აღნიშნულია, რომ ბოლო ცნობებით, უკრაინული ძალები აგრძელებენ კონტრშეტევას სვატოვოს მიმართულებით, ხოლო რუსულმა ძალებმა განახორციელეს შეზღუდული კონტრშეტევები კრემენნაიას მახლობლად.
ანგარიშში ვკითხულობთ, რომ გავრცელებული ინფორმაციით, რუსი ოფიციალური პირები აგრძელებენ მზადებას მობილიზაციის მეორე ტალღისთვის.
___________________
ფოტოზე: ვლადიმერ პუტინი და ევგენი პრიგოჟინი
