გაერთიანებული სამეფოს დაზვერვის 19 იანვრის ანგარიში რუსეთის მიერ უკრაინაში რუსეთის მთავარი საბრძოლო ტანკის – T-14 Armata-ს გამოყენების შესაძლებლობას მიმოიხილავს.
როგორც ანგარიშში ვკითხულობთ, რუსეთი, სავარაუდოდ, მცირე რაოდენობის T-14-ების უკრაინაში გადაყვანას განიხილავს.
ბრიტანული დაზვერვის მონაცემების თანახმად, 2022 წლის გვიან დეკემბერში, სატელიტურმა გამოსახულებამ სამხრეთ რუსეთში, საწვრთნელ ტერიტორიაზე დააფიქსირა T-14 ტანკები. მანამდე კი რუსული სამთავრობო მედია ამტკიცებდა, რომ T-14-ები უკრაინაში გადასაყვანად მზადდება.
2022 წლის 23 დეკემბრით დათარიღებული სატელიტური გამოსახულების ანალიზი აჩვენებს მინიმუმ ორ T-14 Armata ტანკს რუსეთში, კუზმინკას სამხედრო ბარაკებთან ახლოს მდებარე საწვრთნელ ტერიტორიაზე. ისინი კოლონაში იდგნენ ტრანსპორტიორებს შორის საცეცხლე გამოცდის პოლიგონთან ახლოს. თეთრი ზოლით მონიშნულია საცეცხლე პოლიგონი.
მიუხედავად რუსული მედიის მიერ გავრცელებული ინფორმაციისა და რუსულ საწვრთნელ ბაზაზე დაფიქსირებული სატელიტური გამოსახულებებისა, ბრიტანული დაზვერვა წერს, რომ არაა ცნობილი, შეიყვანა თუ არა რუსეთმა ამ ტიპის ტანკები უკრაინაში.
გაერთიანებული სამეფოს დაზვერვის სამსახურის შეფასებით, T-14-ების ომში ჩართვა, სავარაუდოდ, ძალიან სარისკო გადაწყვეტილება იქნება რუსეთისთვის, რადგან ამ ტანკების წარმოების პროგრამის 11 წელი გამოირჩეოდა მუდმივი გაჭიანურებითა და საწარმოო პრობლემებით. გარდა ამისა, რუსეთისთვის გამოწვევა იქნება T-14-ების გადასაყვანად ლოჯისტიკური ჯაჭვის ადაპტირებაც, რამდენადაც ეს ტანკი ბევრად დიდი და მძიმეა სხვა რუსულ ტანკებთან შედარებით.
„სავარაუდოდ, თუ რუსეთი გამოიყენებს T-14-ებს, ეს ძირითადად პროპაგანდისტული მიზნებისთვის იქნება. ამ ტანკების წარმოება ალბათ მხოლოდ რამდენიმე ათეულს მოიცავს, ხოლო მეთაურები, ნაკლებად სავარაუდოა, რომ ბრძოლაში მათ ენდობოდნენ“, – ვკითხულობთ გაერთიანებული სამეფოს დაზვერვის 19 იანვრის ანგარიშში.
____________
ფოტოზე: Т-14. ფოტო: ვიკიპედია
