ყალბი ფულის გასაღებას პროკურატურა რ.შ.-ს ედავება. ბრალდებული მაკლერად მუშაობს და სამი შვილის დედაა. ბრალის დამტკიცების შემთხვევაში მას 7-დან 10 წლამდე თავისუფლების აღკვეთა ემუქრება. ქალს ბრალი მას შემდეგ დაუმძიმდა, როცა გამოძიებას სხვა პირები დაუსახელა, ვინც ყალბი ფულის გავრცელებაში იყო ჩართული.
„მოატყუეს და წინა ადვოკატმაც ვერ დაიცვა. იფიქრა, რომ საპროცესოს გაუფორმებდნენ და გაუშვებდნენ, თუკი სხვების შესახებ მიაწვდიდა ინფორმაციას. პირიქით მოხდა, ბრალი დაუმძიმდა და ამჯერად მას ბრალი ედება ყალბი ფულის გასაღებაში წინასწარ შეთანხმებული ჯგუფის მიერ. რ.შ. არ აღიარებს ჯგუფთან ერთად მოქმედებას“, – უთხრა „ბათუმელებს“ ბრალდებულის ადვოკატმა, ნოდარ ბოლქვაძემ.
საქმის მასალების მიხედვით, ბრალდებულმა 700 დოლარის ყალბი კუპიურა გაყიდა და ამის სანაცვლოდ 350 დოლარი მიიღო. ადვოკატის ინფორმაციით, ბრალდებულს კონკრეტული პირი ერთ-ერთი სასტუმროს მენეჯერად გაეცნო, რომელმაც მას ყალბი ფულის გასაღება შესთავაზა. „ეს მენეჯერი მოგვიანებით ფინანსური პოლიციის თანამშრომელი აღმოჩნდა, ვინც მაკლერთან საუბარი აუდიომოწყობილობით ჩაიწერა”.
ყალბი ფულის გასაღების საქმეს მოსამართლე დავით მამისეიშვილი განიხილავს.
