რუსი გენერალ-პოლკოვნიკი ალექსანდრე ლაპინი ბოლო დროს მედიის ყურადღების ცენტრში იმით მოექცა, რომ ის პისტოლეტით დაემუქრა ერთ-ერთი „მობილიზებული“ ქვედანაყოფის მეთაურს, რომელმაც ფრონტის ხაზიდან ბრძანების გარეშე დაიხია უკან – ლუგანსკის რეგიონში.
ამჯერად გენერალს საჯაროდ აკრიტიკებს ერთ-ერთი მობილიზებულის ცოლი, ტატიანა ნაზარენკო. ქალი წერს, რომ მისი ქმარი, რომელიც 91711 სამხედრო ნაწილში იმყოფებოდა, საჭიროებს დახმარებას, თუმცა მას ჯერჯერობით არავინ ეხმარება.
„128 ადამიანიდან დარჩა მხოლოდ 12!!! მეთაურებმა და ოფიცრებმა ისინი მაშინვე მიატოვეს. ისინი ორი დღეა ცდილობენ ჩვენს სამხედროებთან დაკავშირებას“, – წერს რუსი ქალი, ტატიანა ნაზარენკო.
ის წერს, რომ გადარჩენილმა ჯარისკაცებმა მიაღწიეს ქალაქ მაკეევკამდე, მაგრამ იქ მობილიზებულები დეზერტირებად მიიჩნიეს. რუსეთში, სამხედრო კომისარიატში კი არაფრით ეხმარებიან.
ქალი შიშობს, რომ ამ შემთხვევაშიც იგივე მეორდება, რაც ლიმანში მოხდა და კითხულობს, სად არის გენერალი ლაპინი, რომელიც ფრონტის ამ ხაზის მეთაურია.
___
საქმე იმაშია, რომ გასული კვირას მობილიზებული რუსების ჯგუფი, რომლებიც სვატოვოს რაიონში გააგზავნეს, უკრაინის არმიის ინტენსიური დაბომბვის ქვეშ მოხვდნენ. შეტაკება დღე-ნახევარი გაგრძელდა. საბოლოოდ, „მობილიზებულებმა“ სვატოვოში უკან დახევა გადაწყვიტეს, რადგან მათთან ერთად არ იყვნენ ოფიცრები და სხვა მეთაურები.
ერთ-ერთი მობილიზებულის თქმით, ისინი ბენზინგასამართ სადგურთან იდგნენ, როდესაც მათთან მივიდა გენერალ-პოლკოვნიკი ლაპინი პირადი მცველების თანხლებით. მას შემდეგ, რაც შეიტყო უკანდახევის შესახებ, ლაპინმა პისტოლეტი დაუმიზნა მეხუთე ასეულის მეთაურს, ლეიტენანტ ვ.-ს და უკან მოითხოვა უკან დაბრუნებულიყვნენ. მან ისინი სიტყვიერადაც შეურაცხყო.
___
მთავარი ფოტო: გენერალი ლაპინი
