„სასწაული ამბავი მოვისმინეთ“ – რიჟვაძის თავდასხმა სახალხო დამცველზე

აჭარის მთავრობის თავმჯდომარე, თორნიკე რიჟვაძე, სახალხო დამცველის მიერ „ავარიული სახლების“ პროგრამასთან დაკავშირებული საკანონმდებლო ცვლილებების საკონსტიტუციო სასამართლოში გასაჩივრების საკითხს გამოეხმაურა, ნინო ლომჯარია გააკრიტიკა და თქვა, რომ ის „ნაცების სახალხო დამცველი“ და „ნაციონალურ მოძრაობასთან შეზრდილი“ ორგანიზაციის ხელმძღვანელია.

„როგორც მოგეხსენებათ, მთავარი გამოწვევა ბათუმისთვის არის ავარიული სახლები და ამ ავარიულ სახლებში მცხოვრები 3000 ოჯახის მდგომარეობა და სულ რამდენიმე წუთის წინ სასწაული ამბავი მოვისმინეთ, რომ ის ღონისძიებები, რომლებიც ტარდება ავარიული სახლების პროგრამის ასამოქმედებლად, სადაც ჩვენ უმაღლესმა საკანონმდებლო ორგანომ მხარდაჭერა გამოგვიხატა.

სახალხო დამცველმა, ალბათ, სახალხო უნდა მოვაშოროთ და უფრო ნაცებთან შეზრდილი ორგანიზაცია – ნაცების დამცველი სახალხო დამცველია ეგ და რა თქმა უნდა, როგორც ყველა კარგ საქმეზე მიიტანეს იერიში. საკონსტიტუციო სასამართლოში გაასაჩივრეს.

ჩვენ აუცილებლად დავიცავთ საკონსტიტუციო სასამართლოში ამ საკანონმდებლო ცვლილებებს, ქალაქისთვის ამ მართლაც მნიშვნელოვანი პროგრამის დაზიანების დისკრედიტაციის და მით უმეტეს, გაჩერების შესაძლებლობას“, – განაცხადა თორნიკე რიჟვაძემ, დღეს, 18 აგვისტოს, მთავრობის სხდომაზე.

რიჟვაძის ინფორმაციით, „ავარიული სახლების“ პროგრამის ფარგლებში ბათუმის მერიამ უკვე დაიწყო ოთხი სახლის ჩანაცვლების პროექტი, რომლის ფარგლებშიც 200-ზე მეტი ოჯახი მერიის მიერ გამოყოფილ ფართობში მიიღებს საცხოვრისს.

„მე მინდა ვთხოვო დეველოპერულ სექტორს, რომ მაქსიმალური ყურადღება გამოიჩინონ, მოსახლეობასთან კომუნიკაციაში, მაქსიმალურად მალე მიაღწიონ შეთანხმებას, რომ ჩვენ შევძლოთ ამ პროგრამის კიდევ უფრო დიდი მასშტაბებით ამოქმედება“.

სახალხო დამცველმა საკონსტიტუციო სასამართლოს მიმართა. ომბუდსმენი ბათუმში დაგეგმილი მშენებლობების განსახორციელებლად დამტკიცებული დროებითი საგამონაკლისო წესის შეჩერებას და არაკონსტიტუციურად ცნობას ითხოვს.

აჭარის მთავრობის დღევანდელი სხდომის დღის წესრიგით, მხოლოდ ერთი საკითხი იყო გათვალისწინებული და ის „ემ სი ქონსტრაქშენის მიმართ“ გარკვეული შეღავათების გაწევას, საინვესტიციო საქმიანობის ხელშეწყობას გულისხმობდა.

ომბუდსმენმა გაასაჩივრა სპეციალურად ბათუმისთვის მიღებული კანონი – K2-ის ექსკლუზივი მერს