უკრაინის პრეზიდენტმა თავის უახლეს ვიდეომიმართვაში 2008 წლის აგვისტოს ომი გაიხსენა. ვოლოდიმირ ზელენსკის აზრით, რუსეთის სამხედრო აგრესიამ საქართველოში აჩვენა, რომ უსაფრთხოების რეგიონულმა და გლობალურმა მექანიზმებმა არ იმუშავა.
„ამ დღეებში ხშირად იხსენებენ 2008 წლის რუსეთის ომს საქართველოს წინააღმდეგ. ბევრს ლაპარაკობენ ამ ომის წინაპირობებზეც და შედეგებზეც. იმაზე, რომ უკრაინისა და საქართველოსთვის NATO-ს წევრობის სამოქმედო გეგმის მინიჭებაზე უარის თქმამ რუსეთის ხელისუფლების თავხედობა გაზარდა. და მაინც, მაშინდელი ომი არ გამხდარა ისტორია, ის წარსულში არ გადასულა. უნდა ვილაპარაკოთ არამხოლოდ იმაზე, რაც იყო, არამედ იმაზეც, რის გაკეთება შეიძლება,“ – განაცხადა ზელენსკიმ.
პრეზიდენტის თქმით, გამოწვევები, რომლებიც მაშინ არსებობდა, ახლაც აქტუალურია, რადგან კავკასიის ამ ნაწილში, რუსეთის შემდგომი აგრესიის საფრთხე კვლავაც რჩება.
„მსოფლიომ მხოლოდ ახლა დაიწყო იმის გაცნობიერება, რატომაა აუცილებელი ნებისმიერი აგრესორის დასჯა და რეალური ინსტრუმენტების შექმნა, რათა აღარ დაუშვას ასეთი აგრესია. 2008, 2014, 2022 -ამ წლებში დაწყებულ ომებს სხვადასხვა მასშტაბი და ხასიათი აქვს, მაგრამ ერთი არსი: უსაფრთხოების რეგიონულმა და გლობალურმა მექანიზმებმა ვერ იმუშავა.
სწორედ ამიტომაც საერთაშორისო ურთიერთობებში აუცილებელია პრევენციის პრინციპის შექმნა, რაზეც ჩვენ 24 თებერვლამდე დიდი ხნით ადრე ვლაპარაკობდით. როდესაც უკვე ცხადია, რომ რომელიმე სახელმწიფო აგრესიას გეგმავს – უსამართლო, არაპროვოცირებულ, უკანონო აგრესიას, მაშინ მსოფლიოს რეაქცია ამ მზადებაზე უნდა იყოს ისეთი, როგორც უკვე მომხდარ აგრესიაზე. არ უნდა ველოდოთ დარტყმებსა და მსხვერპლს, არამედ ვიმოქმედოთ იმისთვის, რომ ომი არ დავუშვათ,“ – ამბობს უკრაინის პრეზიდენტი.
ვოლოდიმირ ზელენსკის განცხადებით, რუსეთის აგრესიის შემდეგ უკრაინაში აღარც აქტიური და არც გაყინული კონფლიქტი არ უნდა დარჩეს.
ეს მნიშვნელოვანი გაკვეთილია. უკრაინამ უნდა დაიბრუნოს ყველაფერი, რაც რუსეთმა დროებით დაიპყრო, ხოლო აგრესორი სახელმწიფო დანაშაულისთვის უნდა დაისაჯოს.
მხოლოდ აგრესორის აშკარა დამარცხება, დაპყრობილი ტერიტორიების დაბრუნება და საერთაშორისო-სამართლებრივი პასუხისმგებლობაა ის, რაც მომავალში ნებისმიერ სხვა ომს თავიდან აგვაცილებს“.
თავის გამოსვლაში ზელენსკიმ მადლობა გადაუხადა უკრაინელ მებრძოლებსა და დასავლელ პარტნიორებს, განსაკუთრებით კი აშშ-ის პრეზიდენტს, ჯო ბაიდენს უკრაინის დახმარების ახალი პაკეტისთვის, რომელიც „ჰაიმარსის“ რაკეტებს, არტილერიის საბრძოლო მასალებს და სხვა შეიარაღებას მოიცავს.
