უკრაინის პრეზიდენტის ოფისის მრჩევლის, მიხაილო პოდოლიაკის თქმით, უკრაინის საბრძოლო დანაკარგები ივნისთან შედარებით დაახლოებით სამჯერ შემცირდა.
როგორც BBC Украина-სთან ინტერვიუში პოდოლიაკი ამბობს, ფრონტზე დღეში დაახლოებით 30-50 სამხედრო კვდება.
„ჩვენი მხრიდან ამაზე ლაპარაკი ცოტა არ იყოს არაკორექტულია. ეს რიცხვები გენერალური შტაბის საქმეა,“ – დასძენს მიხაილო პოდოლიაკი.
მისი თქმით, ივნისში შედარებით დიდი დანაკარგები გამოწვეული იყო ომის მეორე ეტაპზე გადასვლით, როდესაც არტილერიის ომი დაიწყო და მტერმა უკრაინელთა პოზიციებს „დააყარა“.
„დღეისთვის დანაკარგების რაოდენობა შემცირებულია, პირველ რიგში იმიტომ, რომ რუსეთის ლოგისტიკურ ცენტრებთან დაკავშირებით ძალიან ეფექტიანად მუშაობს ჩვენი ზალპური ცეცხლის სისტემები. მეორეც, ფრონტის მთელ ხაზზე რუსეთის არმიის გადაჯგუფება მიდის და მესამე – ჩვენებმა უკვე ისწავლეს რუსული არმიის ტაქტიკა და უფრო მოქნილად და ეფექტიანად იცავენ თავს,“ – განმარტავს პოდოლიაკი.
მიხიალო პოდოლიაკი ივნისში აცხადებდა, რომ დონბასში უკრაინა ყოველდღიურად 100-დან 200-მდე ჯარისკაცს კარგავდა. მანამდე, ვოლოდიმირ ზელენსკიმ თქვა, რომ დღეში დაახლოებით 500 სამხედრო იჭრებოდა, ხოლო 60-დან 100-მდე იღუპებოდა.
უფრო ადრე, ჯერ კიდევ აპრილში, პრეზიდენტმა მედიას უთხრა, რომ 24 თებერვლის შემდეგ, 2 500-3 000 უკრაინელი სამხედრო იყო დაღუპული, 10 000 კი – დაჭრილი.
ეს იყო ერთადერთი შემთხვევა, როდესაც უკრაინამ რუსეთთან ომში ცოცხალი ძალის დანაკარგების შესახებ ინფორმაცია გაავრცელა. უკრაინის გენშტაბი დაღუპული და დაჭრილი უკრაინელი სამხედროების, ასევე, განადგურებული ტექნიკის რაოდენობას არ აქვეყნებს.
მთავარი ფოტო: Strana.ua
