დიდი ბრიტანეთის დაზვერვის ცნობებით, 19 ივნისის შემდეგ რუსულმა ძალებმა დაახლოებით 5 კილომეტრით წაიწიეს წინ ლისიჩანსკის მისადგომებისკენ.
დღევანდელ სადაზვერვო ცნობარში გაერთიანებული სამეფოს თავდაცვა აღნიშნავს, რომ უკრაინის შეიარაღებული ძალების ნაწილებმა, სავარაუდოდ, უკან დაიხიეს, რათა ალყაში არ მოქცეულიყვნენ.
„რუსეთის წარმატება ამ სექტორში, დიდი ალბათობით, რუსეთის ქვედანაყოფების გაძლიერებისა და ინტენსიური შეტევების შედეგია“, – მიუთითებს დიდი ბრიტანეთის დაზვერვა.
უწყების ინფორმაციით, რუსეთის ძალები ლისიჩანსკი-სევეროდონეცკის მონაკვეთისკენ მჭიდროდ დასახლებული ზონებიდან მიიწევენ წინ, თუმცა მათი მცდელობა, დაიკავონ დონეცკის დასავლეთ ნაწილი, ჯერჯერობით, კვლავაც წარუმატებელია.
გაერთიანებული სამეფოს თავდაცვა უკრაინაში მიმდინარე მოვლენებზე განახლებას ყოველდღიურად აქვეყნებს. 22 ივნისის სადაზვერვო ცნობარში უწყება აღნიშნავდა, რომ რუსეთი დონბასში დიდი რაოდენობით სარეზერვო ქვედანაყოფების გადასასროლად ემზადება.
მთავარი ფოტო: უკრაინის საომარი მოქმედებების რუკა 22 ივნისის მდგომარეობით/დიდი ბრიტანეთის დაზვერვა
