დიდი ბრიტანეთის დაზვერვა ტვიტერზე 30 მაისის განახლებაში რუსეთის შეიარაღებული ძალების მდგომარეობას აფასებს და ოფიცრებს შორის გამანადგურებელი დანაკარგის მიზეზად კვალიფიციური კადრების ნაკლებობას და ცუდ დისციპლინას ასახელებს.
უწყება აღნიშნავს, რომ ბატალიონებისა და ბრიგადების მეთაურებს ფრონტის წინა ხაზზე უშვებენ, რადგან არმიის ხელმძღვანელობა დანაყოფების მოქმედებაზე პასუხისმგებლობას უშუალოდ მათ აკისრებს. ისევე, როგორც უმცროს ოფიცრებს, რომლებიც იძულებულნი იყვნენ ეხელმძღვანელათ ყველაზე დაბალი რანგის ტაქტიკური მანევრებისთვის, რადგან არმიაში სერჟანტის უფლებამოსილებით აღჭურვილი, კარგად მომზადებული კადრების ნაკლებობაა.
სწორედ ისინი ასრულებენ ამ მოვალეობას დასავლეთის სამხედრო ძალებში.
„პროფესიონალი ოფიცრების ახალგაზრდა თაობის მნიშვნელოვანი ნაწილის დაკარგვა, სავარაუდოდ, გააღრმავებს მეთაურობისა და მართვის მოდერნიზაციის ისედაც არსებულ პრობლემებს.
მეტიც, ტაქტიკური ჯგუფების ბატალიონები, რომლებიც უკრაინაში გადარჩენილი ნაწილებისგან და სხვადასხვა დანაყოფისგან იქმნება, უმცროსი მეთაურების ნაკლებობის გამო, სავარაუდოდ, კიდევ უფრო ნაკლებად ეფექტიანები და ბრძოლისუნარიანები გახდებიან“, – აღნიშნავს დიდი ბრიტანეთის დაზვერვა.
უწყება მიუთითებს, რომ უკრაინიდან მიღებული ცნობებით, რუსეთის ძალებში ადგილი აქვს ლოკალურ აჯანყებებს.
„ამ ფონზე, ასეულებისა და ოცეულების გამოცდილი, სანდო მეთაურების ნაკლებობა, დიდი ალბათობით, კიდევ უფრო დააქვეითებს რუსეთის არმიის საბრძოლო განწყობას და უარყოფითად იმოქმედებს მის ისედაც ცუდ დისციპლინაზე“.
დიდი ბრიტანეთის დაზვერვა უკრაინაში მიმდინარე მოვლენების შესახებ ინფორმაციას ყოველდღიურად აახლებს.
მთავარი ფოტო: 24tv.ua
